کویت ایک بار پھر عالمی سطح پر توجہ کا مرکز بننے جا رہا ہے، جہاں فروری 2026ء کے پہلے ہفتے میں ڈیجیٹل دنیا کے مستقبل سے متعلق انتہائی اہم بین الاقوامی سرگرمیاں منعقد ہوں گی۔
عرب میڈیا کے مطابق 4 اور 5 فروری 2026ء کو کویت میں ڈیجیٹل تعاون تنظیم کی پانچویں جنرل اسمبلی کے اجلاس کے ساتھ ساتھ ڈیجیٹل تعاون کے دوسرے بین الاقوامی فورم کا انعقاد کیا جا رہا ہے، جہاں دنیا کے 60 سے زائد ممالک کے وزرا، پالیسی ساز، عالمی اداروں کے نمائندے، نجی شعبے کے سربراہان اور ٹیکنالوجی ماہرین شریک ہوں گے۔
مزید پڑھیں
فورم میں عالمی ڈیجیٹل تعاون اور دنیا بھر میں ڈیجیٹل معیشت کے مستقبل پر تفصیلی تبادلہ خیال کیا جائے گا۔
ڈیجیٹل کوآپریشن آرگنائزیشن (DCO) کی جنرل اسمبلی کو تنظیم کا اہم ترین سالانہ فورم سمجھا جاتا ہے، جہاں رکن ممالک کی قیادت عالمی سطح پر درپیش ڈیجیٹل چیلنجز، مشترکہ مواقع اور مستقبل کی حکمت عملیوں پر غور کرتی ہے۔ اجلاس میں نہ صرف گزشتہ
برس (2025ء) کی کارکردگی اور اہداف کا جائزہ لیا جائے گا بلکہ آئندہ برسوں کے لیے تنظیم کی سمت کا تعین بھی کیا جائے گا۔
علاوہ ازیں 2025ء سے 2028ء تک کے لیے ڈیجیٹل تعاون سے متعلق نئی اور مؤثر عالمی سطح کی ڈیجیٹل سرگرمیوں اور منصوبوں کے آغاز کا اعلان بھی متوقع ہے۔
اہم عالمی اجلاس کی صدارت کویت کے وزیر مملکت برائے مواصلات عمر العُمَر کریں گے جو اس وقت ڈیجیٹل تعاون تنظیم کی کونسل کے چیئرمین بھی ہیں۔
اجلاس میں تنظیم کی سیکریٹری جنرل دیمہ الیحییٰ بھی شریک ہوں گی، جو ڈیجیٹل کوآپریشن آرگنائزیشن کے وژن، ترجیحات اور مستقبل کے منصوبوں پر تفصیلی بریفنگ دیں گی۔
واضح رہے کہ یہ جنرل اسمبلی عالمی سطح پر ڈیجیٹل شراکت داری کو مضبوط بنانے اور مختلف ممالک کے درمیان ٹیکنالوجی کے شعبے میں ہم آہنگی پیدا کرنے کے لیے ایک اسٹریٹیجک پلیٹ فارم کی حیثیت رکھتی ہے۔
علاوہ ازیں ڈیجیٹل تعاون کے بین الاقوامی فورم میں 6 بنیادی موضوعات کو مرکزی حیثیت حاصل ہوگی، جن میں مصنوعی ذہانت، جامع اور ہمہ گیر ڈیجیٹل ترقی، ڈیجیٹل معیشت کی پالیسی سازی، جدت طرازی، ڈیجیٹل شمولیت اور مستقبل کی ٹیکنالوجیز شامل ہیں۔
فورم کا مقصد یہ ہے کہ ڈیجیٹل انقلاب کے فوائد دنیا کے تمام طبقات تک پہنچ سکیں، جس کے نتیجے میں ترقی پذیر ممالک بھی عالمی ڈیجیٹل معیشت میں مؤثر کردار ادا کر سکیں۔
دونوں اہم تقریبات کویت کے لیے غیر معمولی سفارتی اور معاشی اہمیت رکھتی ہیں کیوں کہ اس سے نہ صرف کویت کی ڈیجیٹل قیادت کو عالمی سطح پر تسلیم کیا جا رہا ہے بلکہ وہ ایک علاقائی اور بین الاقوامی ڈیجیٹل مرکز کے طور پر بھی ابھر رہا ہے۔
اسی طرح عالمی میڈیا کے لیے بھی یہ ایک سنہری موقع ہوگا جہاں اعلیٰ سطح کے مباحث، اہم فیصلے اور عالمی رہنماؤں کے خصوصی انٹرویوز ڈیجیٹل مستقبل کی سمت واضح کریں گے۔