امریکا نے ورلڈ کپ 2026 میں شرکت کرنے والی ایرانی فٹبال ٹیم کو اپنے میچوں سے ایک روز قبل ملک میں داخلے کی اجازت دے دی ہے۔
اس فیصلے سے قبل خدشات ظاہر کیے جا رہے تھے کہ ایرانی ٹیم کو میچ والے دن ہی امریکا آنا اور واپس جانا پڑے گا۔ تاہم ویزا تنازع اب بھی برقرار ہے کیونکہ ایرانی وفد کے متعدد اہم عہدیداروں کو تاحال امریکی ویزے جاری نہیں کیے گئے۔
امریکی محکمہ داخلی سلامتی نے منگل کی شام اعلان کیا ہے کہ میکسیکو کے شہر تیخوانا میں تربیتی کیمپ لگانے والی ایرانی قومی فٹبال ٹیم کو ورلڈ کپ 2026 کے گروپ مرحلے کے اپنے تینوں میچوں سے ایک روز قبل امریکہ میں داخل ہونے کی اجازت دی جائے گی۔
اس سے قبل ہفتے کے آغاز میں بعض میڈیا رپورٹس میں میکسیکو میں ایران کے سفیر ابوالفضل بسندیدہ کے حوالے سے کہا گیا تھا کہ ایرانی ٹیم کو میچ کے دن ہی امریکہ میں داخل ہونا اور اسی روز واپس جانا پڑے گا، جس سے سفری اور انتظامی مسائل کے ساتھ ٹیم کی کارکردگی پر ممکنہ اثرات کے بارے میں خدشات پیدا ہوئے تھے۔
مزید پڑھیں
تاہم امریکی محکمہ داخلی سلامتی کے ترجمان نے ان اطلاعات کی تردید کرتے ہوئے کہا کہ ایرانی ٹیم کو میچ والے دن پہنچنے کی ضرورت نہیں ہوگی۔
بیان میں مزید کہا گیا کہ یہ دعوے درست نہیں ہیں۔
صدر ڈونلڈ ٹرمپ کی فراخ دلی کے باعث ایرانی ٹیم کو اپنے میچوں سے ایک روز قبل امریکہ پہنچنے کی اجازت ہوگی۔
پیر کے روز تیخوانا میں خبر رساں ادارے رائٹرز سے مترجم کے ذریعے گفتگو کرتے ہوئے میکسیکو میں ایران کے سفیر نے امریکی حکام پر تنقید کی اور کہا کہ انہوں نے ایرانی فٹبال فیڈریشن کے بعض اہلکاروں کو ویزے جاری کرنے سے انکار کر دیا ہے۔
کئی ہفتوں کی غیر یقینی صورتحال کے بعد امریکہ نے گزشتہ جمعے تمام ایرانی کھلاڑیوں کو ویزے جاری کر دیے، جو ٹیم کے پہلے میچ سے صرف 10 دن قبل جاری ہوئے۔
تاہم ایرانی فٹبال فیڈریشن کے مطابق وفد کے متعدد ارکان، جن میں اہم انتظامی اور ایگزیکٹو عہدیدار شامل ہیں، اب بھی امریکی ویزوں سے محروم ہیں۔
میکسیکو میں ایرانی سفارت خانے کے مطابق ویزا نہ ملنے والوں میں ٹیم منیجر، دو پرفارمنس تجزیہ کار، میڈیا ڈائریکٹر اور ایرانی وزارت خارجہ کا ایک نمائندہ شامل ہیں۔
ایران اپنا پہلا میچ 15 جون کو لاس اینجلس میں نیوزی لینڈ کے خلاف کھیلے گا، جبکہ 6 دن بعد اسی شہر میں بیلجیئم کا سامنا کرے گا۔
گروپ مرحلے کا آخری میچ 26 جون کو سیئٹل میں مصر کے خلاف کھیلا جائے گا۔
واضح رہے کہ ایرانی ٹیم نے ابتدا میں امریکی ریاست ایریزونا میں تربیتی کیمپ لگانے کا منصوبہ بنایا تھا، تاہم فروری کے آخر میں امریکہ اور اسرائیل کی جانب سے ایران کے خلاف جنگ شروع ہونے کے بعد اس منصوبے کو تبدیل کر دیا گیا۔