کویت کی وزارتِ صحت نے اعلان کیا ہے کہ آج بدھ کے روز کویت انٹرنیشنل ایئرپورٹ پر ہونے والے ایرانی حملے کے نتیجے میں زخمی ہونے والوں کی تعداد 63 تک پہنچ گئی ہے، جن میں 7 افراد کی ہنگامی بڑی سرجری کی گئی۔
زخمیوں میں عام شہری، ایئرپورٹ کے ملازمین اور مسافر شامل ہیں۔
دوسری جانب کویتی مسلح افواج نے بتایا کہ انہوں نے ملکی فضائی حدود میں داخل ہونے والے 13 دشمن بیلسٹک میزائلوں کا سراغ لگا کر انہیں مختلف رہائشی علاقوں کے اوپر تباہ کیا، جس کے نتیجے میں بعض مقامات پر میزائلوں کے ٹکڑے گرے۔
مزید پڑھیں
فوج کے مطابق 17 دشمن ڈرونز کو بھی تباہ کیا گیا۔
ایرانی حملوں میں اہم شہری اور حساس تنصیبات کو نشانہ بنایا گیا، جن میں کویت انٹرنیشنل ایئرپورٹ بھی شامل ہے۔ حملے کے نتیجے میں بھارتی شہریت رکھنے والا ایک مقیم شخص ہلاک جبکہ درجنوں افراد زخمی ہوئے، اس کے علاوہ اہم تنصیبات کو بھی شدید مالی نقصان پہنچا۔
کویتی مسلح افواج نے ہلاک ہونے والے شخص کے اہلِ خانہ سے تعزیت کا اظہار کرتے ہوئے زخمیوں کی جلد صحت یابی کی دعا کی ہے۔
ساتھ ہی شہریوں اور رہائشیوں سے اپیل کی گئی ہے کہ وہ میزائلوں کے ملبے یا متاثرہ مقامات کے قریب نہ جائیں اور نہ ہی ان کی تصاویر یا ویڈیوز سوشل میڈیا پر شیئر کریں تاکہ قومی سلامتی اور عوامی تحفظ کو یقینی بنایا جا سکے۔
ادھر کویت نے ایران کے خلاف سفارتی سطح پر بھی سخت اقدامات کیے ہیں۔
وزارتِ خارجہ نے ایران کے ناظم الامور حامد حمید یعقوبی فر کو طلب کرکے انہیں سرکاری احتجاجی مراسلہ تھما دیا۔
کویت نے ایرانی سفارت خانے کے عملے کی تعداد کم کرنے کا اعلان کرتے ہوئے دو ایرانی سفارت کاروں کو ’ناپسندیدہ شخصیت‘ قرار دیا ہے اور انہیں 24 گھنٹوں کے اندر ملک چھوڑنے کا حکم دیا ہے۔
کویتی وزارتِ خارجہ کے مطابق یہ فیصلہ ایران کی جانب سے بیلسٹک میزائلوں اور ڈرون حملوں کے مسلسل سلسلے کے بعد کیا گیا، جنہوں نے کویت کے شہری مراکز، اہم تنصیبات اور کویت انٹرنیشنل ایئرپورٹ کو نشانہ بنایا۔
ان حملوں کے نتیجے میں ایک شخص جاں بحق، درجنوں زخمی اور کئی سفارتی و اہم سرکاری عمارتیں متاثر ہوئیں۔
کویت نے ایرانی حملوں کی شدید الفاظ میں مذمت کرتے ہوئے انہیں ملکی خودمختاری، بین الاقوامی قانون اور اقوام متحدہ کے منشور کی کھلی خلاف ورزی قرار دیا۔
وزارتِ خارجہ نے واضح کیا کہ کویت کسی بھی ملک کے خلاف اپنی سرزمین یا فضائی حدود کو استعمال کرنے کی اجازت نہیں دیتا، اور ایران کے الزامات کو بے بنیاد اور حقائق کے منافی قرار دیا۔