سعودی وزارتِ ہیومن ریسورسز نے نجی شعبے میں خریداری اور لاجسٹکس سے متعلق 12 پیشوں میں سعودائزیشن کی شرح 70 فیصد مقرر کرتے ہوئے اس پر عمل درآمد شروع کر دیا ہے۔
فیصلے کا مقصد سعودی شہریوں کے لیے روزگار کے مواقع بڑھانا اور لیبر مارکیٹ کے اہداف حاصل کرنا ہے۔
سعودی وزارتِ ہیومن ریسورسز نے 31 مئی 2026 سے نجی شعبے میں خریداری ’پروکیورمنٹ‘ سے متعلق پیشوں میں سعودائزیشن کی شرح 70 فیصد تک بڑھانے کے فیصلے پر عمل درآمد شروع کر دیا ہے۔
یہ فیصلہ ان اداروں پر لاگو ہوگا جہاں متعلقہ پیشوں میں کم از کم 3 یا اس سے زائد ملازمین کام کر رہے ہوں، اور اس کا اطلاق سعودی متحدہ پیشہ جاتی درجہ بندی میں منظور شدہ عہدوں اور تعریفوں کے مطابق ہوگا۔
مزید پڑھیں
اس فیصلے کے تحت 12 پیشے شامل ہیں، جن میں پرچیزنگ مینیجر، پرچیزنگ نمائندہ، کنٹریکٹس مینیجر، اسٹور کیپر، لاجسٹکس سروسز مینیجر، ویئرہاؤس مینیجر، ٹینڈر اسپیشلسٹ، پروکیورمنٹ اسپیشلسٹ، ای کامرس اسپیشلسٹ، مارکیٹ ریسرچ اسپیشلسٹ، ویئرہاؤس اسپیشلسٹ اور پرائیویٹ برانڈ سپلائی اسپیشلسٹ شامل ہیں۔
اخبار 24 کے مطابق وزارت نے واضح کیا ہے کہ اس کے نگرانی اور انسپکشن کے ذمہ دار ادارے فیصلے پر عمل درآمد کی نگرانی شروع کر چکے ہیں اور ہدف بنائے گئے اداروں کی جانب سے مقررہ سعودائزیشن شرح پر عمل درآمد کا جائزہ لیا جا رہا ہے۔
وزارت کے مطابق اس اقدام سے قومی افرادی قوت کے لیے زیادہ مستحکم اور پیداواری ماحول فراہم ہوگا، جبکہ مقررہ مہلت کے بعد خلاف ورزی کرنے والے اداروں کے خلاف قانونی کارروائی بھی کی جائے گی۔
وزارت نے بتایا کہ یہ فیصلہ مختلف شعبوں اور پیشوں میں سعودائزیشن کے فروغ کے سلسلے کی ایک کڑی ہے، جس کا مقصد لیبر مارکیٹ کی حکمتِ عملی کے اہداف حاصل کرنا اور خریداری کے شعبے سے وابستہ پیشوں میں سعودی شہریوں کے لیے روزگار کے مزید مواقع پیدا کرنا ہے۔
یہ اقدام مستقبل کی لیبر مارکیٹ کی ضروریات کو قومی افرادی قوت کی صلاحیتوں کے ساتھ ہم آہنگ کرنے، اور نجی شعبے میں معیاری و تخصصی ملازمتوں میں سعودی شہریوں کی شمولیت بڑھانے کے لیے بھی اہم قرار دیا جا رہا ہے۔