آج کے جدید اور تیز رفتار دور میں طویل، سادہ اور خوشگوار زندگی کا حصول ناممکن نہیں، بلکہ یہ ایک ایسی نفسیاتی تربیت ہے جس کے ذریعے انسان ہر لمحے سے لطف اندوز ہوسکتا ہے۔
مزید پڑھیں
اس کی بہترین مثال دنیا کے معمر ترین ڈاکٹر ہووارڈ ٹاکر ہیں، جنہوں نے 75 سال تک طب کے شعبے میں خدمات انجام دی ہیں۔
103 سالہ ماہرِ اعصاب کا منفرد سفر
ہوارڈ ٹاکر نے 2022 میں اپنے اسپتال کے بند ہونے تک طب کے شعبے میں فعال کردار ادا کیا ہے۔
گنیز ورلڈ ریکارڈز میں نام درج کروانے والے ٹاکر کا ماننا ہے کہ لمبی عمر
کے لیے جینیاتی عوامل اور اچھی قسمت بھی اہم حقیقت ہیں، تاہم زندگی کے کچھ بنیادی اصولوں پر عمل کرنا بھی ناگزیر ہے۔
ذہن کو متحرک رکھنے کی اہمیت
ڈاکٹر ٹاکر کے مطابق دماغ جسم کے دیگر پٹھوں کی طرح ہے، جسے استعمال نہ کیا جائے تو وہ کمزور ہوجاتا ہے۔
انہوں نے اپنی ریٹائرمنٹ کے بعد بھی قانونی مقدمات کا مطالعہ اور سوشل میڈیا کا استعمال سیکھ کر خود کو مسلسل سیکھنے کے عمل میں مشغول رکھا ہے۔
مسلسل سیکھنے کا جذبہ
ٹاکر نے 60 سال کی عمر میں قانون کی تعلیم شروع کی اور 67 سال کی عمر میں اوہائیو بار کا امتحان پاس کیا۔
ان کے نزدیک کام کا مطلب صرف نوکری نہیں، بلکہ رضاکارانہ خدمات، مطالعہ، موسیقی یا کوئی بھی ایسی مہارت ہے جو انسان کے ذہن کو فعال اور چست رکھے۔
بغض اور نفرت سے دُوری
ڈاکٹر ٹاکر کا خیال ہے کہ غصہ اور انتقامی جذبات انسان کی توانائی نچوڑ لیتے ہیں، جس سے صحت کو ناقابل تلافی نقصان پہنچتا ہے۔
انہوں نے بتایا کہ منفی سوچ سے بلڈ پریشر بڑھتا ہے اور دل کی بیماریوں کا خطرہ لاحق ہوتا ہے، اس لیے زندگی کو بہتر بنانے کے لیے تلخیوں کو چھوڑنا ضروری ہے۔
اعتدال پسندی : کامیابی کی کنجی
زندگی کا مطلب خود کو ہر نعمت سے محروم کرنا بالکل نہیں ہے اور یہی وجہ ہے کہ ٹاکر بھی اپنی زندگی میں متوازن غذا، سلاد اور سبزیوں کے ساتھ ساتھ اپنی پسندیدہ خوراک سے بھی لطف اندوز ہوتے ہیں۔
اُن کے نزدیک ہر معاملے میں اعتدال ہی طویل مدت تک زندگی کا حقیقی لطف اٹھانے کا بہترین طریقہ ہے۔
ڈاکٹر ٹاکر کا فلسفہ محض طبی مشوروں تک محدود نہیں، بلکہ یہ طرزِ زندگی کا ایک متوازن امتزاج ہے۔
ذہن کو متحرک رکھنا، منفی جذبات سے گریز اور اعتدال پسندی وہ 3 ستون ہیں جن پر ایک طویل، پرسکون اور بامقصد زندگی کی عمارت کھڑی ہو سکتی ہے۔