2025 کے لیے سعودی وژن 2030 کے اعداد و شمار سے ظاہر ہوتا ہے کہ سعودی عرب نے عالمی خوشی کے اشاریئے میں نمایاں پیش رفت کی ہے، جہاں اس کی درجہ بندی 37 ویں نمبر سے بڑھ کر عالمی سطح پر 22 ویں نمبر تک پہنچ گئی، جو معیارِ زندگی اور سماجی فلاح میں تیزی سے بہتری کی عکاسی کرتی ہے۔
سالانہ رپورٹ کے مطابق اشاریئے میں سعودی عرب کا اسکور 6.34 سے بڑھ کر 2025 میں 6.817 پوائنٹس تک پہنچ گیا جبکہ سالانہ ہدف 6.96 پوائنٹس مقرر تھا، یعنی تقریباً 98 فیصد ہدف حاصل کر لیا گیا۔
مزید پڑھیں
سعودی عرب کا ہدف ہے کہ 2030 تک یہ اسکور 7.54 تک پہنچ جائے، جس کے ذریعے دنیا کے بہترین 5 ممالک میں شامل ہونا مقصود ہے۔
عالمی خوشی کا اشاریہ آکسفورڈ یونیورسٹی ویلبیئنگ ریسرچ سینٹر اور گیلپ فاؤنڈیشن کے اشتراک سے جاری کیا جاتا ہے، جس میں صحت، آمدنی، سماجی معاونت، ذاتی آزادی، اعتماد کی سطح اور بدعنوانی کے انسداد جیسے عوامل کو مدنظر رکھا جاتا ہے۔
رپورٹ کے مطابق یہ پیش رفت وژن 2030 کے پروگرامز اور عملی اقدامات کا براہِ راست نتیجہ ہے، جنہوں نے معیارِ زندگی کو بہتر بنانے، صحت کی سہولیات کو فروغ دینے اور تفریح، ثقافت، سیاحت اور کھیلوں کے مواقع کو وسعت دینے میں اہم کردار ادا کیا، ساتھ ہی شہری ماحول کو بہتر بنایا اور صحت مند طرزِ زندگی کو فروغ دیا۔
رپورٹ میں یہ بھی بتایا گیا کہ 2016 کے مقابلے میں نمایاں بہتری حاصل ہوئی ہے تاہم بعض پیمانوں میں ڈیٹا کی درستگی اور تازگی سے متعلق چیلنجز بھی موجود ہیں، خاص طور پر وہ ڈیٹا جس پر بین الاقوامی ادارے انحصار کرتے ہیں۔
2030 تک 7.54 اسکور اور ٹاپ 5 میں شامل ہونے کا ہدف
اہم نکات میں یہ بھی شامل ہے کہ کچھ ادارے صحت مند اوسط عمر کے حوالے سے پرانا ڈیٹا استعمال کر رہے ہیں جبکہ سرکاری اعداد و شمار کے مطابق مملکت میں اوسط عمر تقریباً 79.7 سال تک پہنچ چکی ہے۔
ا س سے ظاہر ہوتا ہے کہ مقامی اداروں کو بین الاقوامی اداروں کے ساتھ مزید ہم آہنگی کی ضرورت ہے تاکہ حقیقی صورتحال بہتر انداز میں پیش کی جا سکے۔
رپورٹ میں زور دیا گیا کہ ڈیٹا کے معیار کو بہتر بنانے اور اسے بروقت اپ ڈیٹ کرنے کے لیے اقدامات جاری ہیں، ساتھ ہی اشاریہ جاری کرنے والے اداروں کے ساتھ تعاون کو بھی مضبوط کیا جا رہا ہے، تاکہ صحت، فلاح اور معیارِ زندگی میں ہونے والی پیش رفت کی درست عکاسی ممکن ہو سکے۔
یہ پیش رفت ایک جامع قومی حکمتِ عملی کی عکاس ہے، جس کا مقصد فلاح اور معیارِ زندگی کے تصورات کو قابلِ پیمائش نتائج میں تبدیل کرنا ہے اور حکومتی کوششوں، شہری ترقی اور عوام کے لیے بہتر مواقع فراہم کر کے سعودی عرب کو آنے والے برسوں میں عالمی خوشی کے اشاریے میں سرفہرست ممالک میں شامل کرنا ہے۔