وزارتِ حج و عمرہ نے کہا ہے کہ حج 1447ھ کے لیے آنے والے تمام عازمین کو نسک کارڈ ان کے اپنے ممالک میں روانگی سے قبل فراہم کیا جا رہا ہے تاکہ حج انتظامات میں ابتدائی سطح پر مکمل تیاری اور سہولت کو یقینی بنایا جا سکے۔
وزارت کے مطابق اس اقدام کا مقصد عازمین کی آمد کے ساتھ ہی تمام مراحل، بشمول نقل و حمل، رہائش اور رہنمائی کو آسان بنانا ہے تاکہ حجاج کرام اپنے روحانی سفر کا آغاز مکمل اطمینان اور سکون کے ساتھ کر سکیں۔
مزید پڑھیں
سعودی پریس ایجنسی کے مطابق نسک کارڈ جدید ڈیجیٹل و فزیکل شناختی کارڈ ہے، جس میں عازمین کی مکمل معلومات، رہائش اور خدمات کی تفصیلات درج ہوتی ہیں اور یہ سعودی عرب کے مربوط تکنیکی نظام سے منسلک ہوتا ہے، جس سے حج کے پورے سفر کو منظم اور محفوظ بنایا جاتا ہے۔
حکام کا کہنا ہے کہ اس کارڈ کے ذریعے حجاج کی فوری شناخت، رہنمائی
اور خدمات تک رسائی آسان ہو جاتی ہے، جبکہ گمشدگی یا ہنگامی صورتحال میں فوری مدد بھی ممکن ہوتی ہے۔
دوسری جانب، وزارت نے واضح کیا ہے کہ غیر قانونی حج کے انسداد کے لیے سخت اقدامات کیے جا رہے ہیں، جن میں داخلی راستوں پر سخت چیکنگ، بغیر اجازت افراد کے داخلے پر پابندی، اور نسک کارڈ کو حج کی بنیادی شرط قرار دینا شامل ہے۔
حج کے دوران شناخت اور سہولت میں نمایاں بہتری
حکام کے مطابق، بغیر اجازت حج کرنے والوں کے خلاف سخت قانونی کارروائی کی جائے گی، جس میں بھاری جرمانے، قید، غیر ملکیوں کی ملک بدری اور مستقبل میں حج پر پابندی جیسے اقدامات شامل ہو سکتے ہیں۔
وزارتِ حج و عمرہ نے زور دیا کہ نسک کارڈ کا اجرا نہ صرف حجاج کی سہولت کے لیے ایک اہم قدم ہے بلکہ حج کے نظام کو مزید محفوظ، منظم اور شفاف بنانے میں بھی کلیدی کردار ادا کرے گا۔
خیال رہے کہ وزارت داخلہ نے غیر ملکیوں کے لیے اجازت نامے کے بغیر مکہ مکرمہ میں داخلے پر بھی پابندی عائد کر رکھی ہے۔
خلاف ورزی کی صورت میں سزا ہوسکتی ہے۔