سعودی عرب نے 2025 کے دوران کھجوروں کی برآمدات میں ریکارڈ اضافہ کرتے ہوئے زرعی شعبے میں ایک نئی کامیابی حاصل کر لی، جہاں برآمدات کی مالیت 1.938 ارب ریال تک پہنچ گئی۔
یہ حجم 2024 کے مقابلے میں 14.3 فیصد جبکہ 2021 کے بعد سے 59.5 فیصد زیادہ ہے، جو عالمی منڈیوں میں سعودی کھجوروں کی بڑھتی ہوئی طلب اور اعلیٰ معیار کی عکاسی کرتا ہے۔
مزید پڑھیں
وزارت ماحولیات، پانی و زراعت کے مطابق یہ پیش رفت وژن 2030 کے اہداف کے تحت غیر تیل برآمدات بڑھانے اور قومی معیشت کو مستحکم بنانے کی حکمت عملی کا حصہ ہے۔
وزیر عبد الرحمن بن عبدالمحسن الفضلی نے اس کامیابی کو قیادت کی بھرپور سرپرستی، جدید زرعی ٹیکنالوجی، مؤثر سپلائی چین اور سرکاری و نجی شعبے کے باہمی تعاون کا نتیجہ قرار دیا۔
ان کے مطابق سعودی کھجوروں کی برآمدات کو عالمی منڈیوں تک وسعت دینے کی مہم نے اس شعبے کو نئی بلندیوں تک پہنچایا ہے۔
سعودی عرب میں کھجوروں کی پیداوار چند بڑے علاقوں میں مرکوز ہے، جن میں القصیم سرفہرست ہے، جہاں سب سے زیادہ پیداوار ہوتی ہے جبکہ الاحساء دنیا کے بڑے نخلستانوں میں شمار ہوتا ہے۔
عجوہ، سکری، خلاص اور مجدول سب سے زیادہ طلب والی اقسام ہیں
مدینہ منورہ اعلیٰ معیار کی کھجوروں خصوصاً عجوہ کے لیے مشہور ہے، جبکہ ریاض ریجن جدید زرعی تکنیک کے باعث تیزی سے ترقی کرتا ہوا اہم مرکز بن رہا ہے۔
اقسام کے لحاظ سے سعودی کھجوریں اپنی منفرد شناخت رکھتی ہیں۔
عجوہ کھجور اپنی مذہبی اہمیت اور اعلیٰ معیار کے باعث نمایاں ہے، جبکہ سکری اپنی غیر معمولی مٹھاس کے باعث مقامی اور عالمی سطح پر بے حد پسند کی جاتی ہے۔
خلاص کھجور خلیجی خطے میں روزمرہ استعمال اور مہمان نوازی کا لازمی حصہ سمجھی جاتی ہے، جبکہ صفاوی اور مجدول اقسام بھی عالمی منڈی میں نمایاں مقام رکھتی ہیں۔
ماہرین کے مطابق عجوہ، سکری، خلاص اور مجدول وہ اقسام ہیں جن کی مانگ سب سے زیادہ ہے، خصوصاً عجوہ اور سکری کو پریمیم کھجوروں میں شمار کیا جاتا ہے۔
ان اقسام کی اعلیٰ کوالٹی، ذائقہ اور غذائیت نے انہیں عالمی صارفین کی اولین ترجیح بنا دیا ہے۔
اعداد و شمار کے مطابق 2025 میں سعودی عرب میں کھجوروں کی مجموعی پیداوار 1.9 ملین ٹن سے تجاوز کر گئی، جبکہ ملک بھر میں 3 کروڑ 70 لاکھ سے زائد کھجور کے درخت موجود ہیں۔
سعودی کھجوریں اس وقت 125 سے زائد ممالک کو برآمد کی جا رہی ہیں، جو عالمی سطح پر مملکت کی مضبوط پوزیشن کو ظاہر کرتی ہیں۔
تجزیہ کاروں کے مطابق سعودی عرب نہ صرف کھجوروں کی پیداوار میں عالمی رہنماؤں میں شامل ہے بلکہ معیار، تنوع اور جدید برآمدی حکمت عملی کے باعث آنے والے برسوں میں اس شعبے کی ترقی مزید تیز ہونے کا امکان ہے، جو ملکی معیشت کے لیے ایک اہم ستون ثابت ہو رہی ہے۔