محکمہ شماریات نے آج جمعرات کو جاری کردہ اعداد و شمار میں کہا ہے کہ فروری 2026 میں سعودی عرب کی غیر تیل برآمدات ’دوبارہ برآمدات سمیت‘ میں فروری 2025 کے مقابلے میں 15.1 فیصد اضافہ ہوا ہے جس کی مالیت تقریباً 31.03 ارب ریال تک ہے۔
اسی طرح غیر تیل برآمدات (دوبارہ برآمدات کے بغیر) میں 6.3 فیصد اضافہ ہو کر تقریباً 17.293 ارب ریال رہیں، جبکہ دوبارہ برآمد کی جانے والی اشیا کی مالیت میں 28.5 فیصد اضافہ ہو کر تقریباً 13.739 ارب ریال ہو گئی۔
مزید پڑھیں
سعودی پریس ایجنسی کے مطابق یہ اضافہ خاص طور پر مشینری، آلات اور برقی سازوسامان اور ان کے پرزہ جات کی برآمدات میں 59.9 فیصد اضافے کے باعث ہوا، جو مجموعی دوبارہ برآمدات کا 53.9 فیصد ہیں۔
فروری میں کل تجارتی برآمدات میں 4.7 فیصد اضافہ ہوا اور یہ تقریباً 99.078 ارب ریال تک پہنچ گئیں، جبکہ اس سے قبل یہ تقریباً 94.615 ارب ریال تھیں۔
اسی دوران تیل کی برآمدات میں 0.6 فیصد اضافہ ہو کر تقریباً 68.05 ارب ریال ہو گیا۔
درآمدات میں سالانہ بنیاد پر 6.6 فیصد اضافہ ہوا اور یہ فروری میں تقریباً 76.13 ارب ریال تک پہنچ گئیں۔
تاہم تجارتی سرپلس میں ایک فیصد کمی آئی اور یہ تقریباً 22.95 ارب ریال رہ گیا۔ مجموعی برآمدات میں تیل کی برآمدات کا تناسب فروری 2025 کے 71.5 فیصد سے کم ہو کر فروری 2026 میں 68.7 فیصد رہ گیا۔
مشترکہ ڈیٹا انیشیٹو کے مطابق، سعودی خام تیل کی برآمدات فروری میں بڑھ کر 7.276 ملین بیرل یومیہ ہو گئیں، جو جنوری میں 6.993 ملین بیرل یومیہ تھیں۔
غیر تیل برآمدات نے اپنی مضبوط کارکردگی جاری رکھی اور 2025 میں تاریخی سطح پر پہنچ گئیں، جہاں یہ 624 ارب ریال تک جا پہنچیں، جو 2024 کے 543 ارب ریال کے مقابلے میں 15 فیصد سالانہ اضافہ ہے۔
اس کے ساتھ مجموعی برآمدات میں ان کا حصہ 39 فیصد سے بڑھ کر 44 فیصد ہو گیا، جو اب تک کی بلند ترین سطح ہے، جبکہ تازہ عالمی اعداد و شمار کے مطابق سعودی عرب شرح نمو کے لحاظ سے جی 20 ممالک میں سرفہرست رہا۔