جامعہ الازہر شريف کی سربرآوردہ علمان بورڈ کے رکن ڈاکٹر شیخ علی جمعہ نے وضاحت کی ہے کہ تعددِ ازدواج کا مسئلہ اکثر سوالات اور الجھنوں کو جنم دیتا ہے، خاص طور پر اس وقت جب خواتین کو اس بارے میں متضاد معلومات ملتی ہیں۔
کبھی انہیں بتایا جاتا ہے کہ انہیں انکار کا حق حاصل ہے اور کبھی کہا جاتا ہے کہ محض انکار کرنا گناہ ہے۔
ان کے مطابق اس الجھن کی بڑی وجہ یہ ہے کہ کچھ لوگ دینی مسائل کے لیے سوشل میڈیا کو ذریعۂ معلومات بنا لیتے ہیں حالانکہ ایسے معاملات کا علم مختصر ویڈیوز یا جذباتی تبصروں سے نہیں بلکہ اہلِ علم اور ماہرین سے حاصل کیا جانا چاہیے۔
مزید پڑھیں
العربیہ کے مطابق ڈاکٹر شیخ علی جمعہ نے کہا کہ اگر کوئی عورت تعددِ ازدواج کو قبول نہ کر سکے یا اسے اس پر اعتراض ہو تو یہ احساس نہ تو عجیب ہے اور نہ ہی گناہ بلکہ یہ وہ فطری کیفیت ہے جس پر اللہ تعالیٰ نے عورتوں کو پیدا کیا ہے۔
یہ احساسات نہ غیر معمولی ہیں اور نہ ہی غیر فطری بلکہ خواتین کے اندر یہ جذبات عام طور پر پائے جاتے ہیں۔
تاہم انہوں نے واضح کیا کہ اس فطری احساس کو شرعی حکم سے الگ کر کے نہیں دیکھا جا سکتا۔
اسلام میں تعددِ ازدواج کوئی ایسا دروازہ نہیں جو انتشار یا بے قاعدگی کو جنم دے، نہ ہی یہ بے راہ روی یا ناجائز تعلقات کا جواز ہے۔
بلکہ یہ نکاح کے اس نظام کا حصہ ہے جسے اللہ تعالیٰ نے باقاعدہ ضابطوں کے ساتھ قائم کیا ہے۔
اس کا بنیادی مقصد غیر شرعی تعلقات اور زنا جیسے گناہوں سے بچاؤ اور معاشرے کو فحاشی سے محفوظ رکھنا ہے۔
چنانچہ شریعت نے مرد و عورت کے تعلق کو خواہشات کے بے لگام میدان کے طور پر نہیں چھوڑا بلکہ اسے ذمہ داریوں، حقوق اور شرعی حدود کے ساتھ منظم کیا ہے۔
انہوں نے مزید کہا کہ بعض لوگوں نے تعدد کی اجازت کو غلط طور پر استعمال کرتے ہوئے اسے ناجائز گفتگو، بے ضابطہ تعارف یا جذباتی خیانت کے لیے بہانہ بنا لیا ہے، گویا مستقبل میں ممکنہ شادی کا تصور ہی حرام چیزوں کو جائز بنا دیتا ہے۔
یہ سوچ سراسر غلط ہے، کیونکہ جو چیز حرام ہے وہ حرام ہی رہتی ہے، اور تعددِ ازدواج بے قاعدگی کو جائز نہیں بناتا بلکہ اسے سخت شرائط اور ذمہ داریوں کے ساتھ محدود کرتا ہے، جن میں سب سے اہم عدل، استطاعت اور حقوق کی ادائیگی ہیں۔
اپنی گفتگو کے اختتام پر ڈاکٹر شیخ علی جمعہ نے کہا کہ تعددِ ازدواج کو ناپسند کرنا عورت کا ایک فطری احساس ہے، جبکہ اس کی اجازت ایک منظم شرعی حکم ہے۔
اصل مسئلہ اس حکم کے غلط استعمال سے پیدا ہوتا ہے جو انتشار اور ظلم کو جنم دیتا ہے۔ صحیح فہم یہ ہے کہ انسان اہلِ علم کی طرف رجوع کرے اور فطرت اور شریعت، اجازت اور بے ضابطگی، اور اصل حکم اور عملی نتائج کے درمیان فرق کو سمجھے۔