مملکت کے جزائر فرسان ریزرو کو انٹرنیشنل یونین فار کنزرویشن آف نیچر (IUCN) کی محفوظ علاقوں کی گرین لسٹ میں شامل کر لیا گیا ہے۔
مزید پڑھیں
یہ اُن عالمی محفوظ قدرتی علاقوں پر مشتمل فہرست ہے جہاں انتظام، منصوبہ بندی اور تحفظ کے مؤثر عالمی معیار نافذ ہوتے ہیں۔
یہ اعزاز مملکت کے ماحولیاتی تحفظ کے عزم اور عالمی ماحولیاتی اشاریوں میں اس کی بڑھتی ہوئی موجودگی کی عکاسی کرتا ہے، جو وژن 2030 کے اہداف کے ساتھ ہم آہنگ ہے۔
نیشنل سینٹر فار وائلڈ لائف کے زیر انتظام ریزرو کی گرین لسٹ میں
شمولیت اس بات کا اعتراف ہے کہ یہاں قدرتی وسائل کے تحفظ کے لیے سائنسی منصوبہ بندی، مؤثر نظام اور مقامی کمیونٹی کی شمولیت کو یقینی بنایا گیا ہے۔
گرین لسٹ کے عالمی معیار
IUCN گرین لسٹ میں شامل ہونے کے لیے محفوظ قدرتی علاقوں کو 4 بنیادی اصولوں پر پورا اترنا ضروری ہوتا ہے۔ ان میں مؤثر گورننس، جامع منصوبہ بندی، انتظامی کارکردگی اور فطرت کے تحفظ کے قابلِ پیمائش نتائج شامل ہیں۔
نیشنل سینٹر فار وائلڈ لائف کے چیف ایگزیکٹو ڈاکٹر محمد علی قربان کے مطابق یہ کامیابی اس بات کی علامت ہے کہ سعودی عرب میں ماحولیات کے شعبے کو قیادت کی بھرپور حمایت حاصل ہے۔
انہوں نے کہا کہ جزائر فرسان ریزرو کی گرین لسٹ میں شمولیت سعودی عرب کے سمندری اور زمینی ماحولیاتی نظام کے تحفظ کے عزم کو ظاہر کرتی ہے۔
ماحولیاتی اور معاشی اہمیت
جزائر فرسان ریزرو کی گرین لسٹ میں شمولیت کو صرف اعزازی کامیابی نہیں سمجھا جاتا بلکہ اس کے عملی اثرات بھی اہم ہیں۔
عالمی منظوری سے ریزرو کے انتظامی اور تکنیکی نظام کو مزید بہتر بنانے میں مدد ملتی ہے کیونکہ اس کے نتیجے میں عالمی معیار کے نگرانی اور تحفظی طریقے اپنائے جاتے ہیں۔
یہ شمولیت جزائر فرسان کو عالمی ایکو ٹورازم کے نقشے پر بھی نمایاں مقام دلانے میں مدد دے سکتی ہے، جس سے ماحول دوست سیاحت اور مقامی معیشت کو فائدہ پہنچنے کے امکانات بڑھ جاتے ہیں۔
جزائر فرسان ریزرو: بحیرہ احمر کا قدرتی خزانہ
جزائر فرسان ریزرو سعودی عرب کے اہم ترین میرین ریزروز میں شمار ہوتا ہے۔ یہ بحیرہ احمر میں واقع ہے اور اس کا رقبہ تقریباً 5,657 مربع کلومیٹر ہے۔
اس ریزرو کے جزیرہ نما سلسلے میں 266 سے زیادہ مرجانی جزائر شامل ہیں، جو اسے خطے کے نمایاں سمندری ماحولیاتی نظاموں میں شامل کرتے ہیں۔
یہ علاقہ حیاتیاتی تنوع کے لحاظ سے بھی انتہائی اہم ہے۔ یہاں تقریباً 180 اقسام کے پودے، 150 اقسام کے پرندے اور 230 اقسام کی مچھلیاں پائی جاتی ہیں۔
اس کے علاوہ یہ ریزرو فرسان ہرن کا قدرتی مسکن ہے اور یہاں مینگرووز کے جنگلات بھی موجود ہیں۔
اس علاقے میں سمندری کچھوؤں اور ڈوگونگ جیسے خطرے سے دوچار جاندار بھی پائے جاتے ہیں، جس کی وجہ سے اسے سمندری حیاتیاتی تنوع کے تحفظ کے لیے اہم مقام حاصل ہے۔
عالمی ماحولیاتی پروگراموں میں نمایاں مقام
جزائر فرسان ریزرو پہلے ہی کئی عالمی ماحولیاتی پروگراموں کا حصہ بن چکا ہے۔ اسے رامسر کنونشن کے تحت بین الاقوامی اہمیت کے حامل ویٹ لینڈز میں شامل کیا جا چکا ہے۔
اس کے علاوہ یہ یونیسکو کے مین اینڈ دی بایوسفیر پروگرام (MAB) کا بھی حصہ ہے، جو انسان اور قدرتی ماحول کے درمیان پائیدار توازن کے فروغ کے لیے قائم کیا گیا عالمی پروگرام ہے۔