عالمی کریڈٹ ریٹنگ ایجنسی اسٹینڈرڈ اینڈ پورز (Standard & Poor’s) نے مملکت کی خودمختار کریڈٹ ریٹنگ ’A+/A-1‘پر برقرار رکھی ہے۔
مزید پڑھیں
ایجنسی کے مطابق مستحکم درجہ بندی اس اعتماد کی عکاس ہے کہ سعودی معیشت موجودہ علاقائی کشیدگی کے اثرات سے نمٹنے کی صلاحیت رکھتی ہے۔
رپورٹ میں کہا گیا ہے کہ مملکت کی مضبوط مالی پوزیشن اور جاری معاشی اصلاحات اس استحکام کی بنیادی وجہ ہیں۔
اسٹینڈرڈ اینڈ پورز نے اپنے بنیادی اندازوں میں کہا ہے کہ موجودہ
علاقائی تنازع سے پیدا ہونے والے بڑے خطرات مارچ کے اختتام تک کم ہو سکتے ہیں، جس کے ساتھ خطے میں کشیدگی میں بھی کمی متوقع ہے۔
رپورٹ میں مزید بتایا گیا ہے کہ اگر کسی وجہ سے اہم سمندری راستوں میں رکاوٹ پیدا ہوتی ہے تو سعودی عرب کے پاس تیل اور گیس کی برآمدات کو بحیرہ احمر کے شہر ینبع کی بندرگاہ کی طرف منتقل کرنے کی صلاحیت موجود ہے۔
اس مقصد کے لیے مشرق سے مغرب تک پھیلی آئل پائپ لائن استعمال کی جا سکتی ہے، جس کے ذریعے سپلائی متاثر ہونے سے بچائی جا سکتی ہے۔
ایجنسی نے پیش گوئی کی ہے کہ 2026 میں سعودی عرب کی حقیقی مجموعی قومی پیداوار (GDP) میں 4.4 فیصد اضافہ متوقع ہے، جبکہ 2027 سے 2029 کے دوران اوسط اقتصادی نمو 3.3 فیصد رہنے کا امکان ہے۔
رپورٹ کے مطابق سعودی معیشت میں غیر تیل (نان آئل) شعبے کا حصہ نمایاں طور پر بڑھ کر تقریباً 70 فیصد تک پہنچ چکا ہے، جبکہ 2018 میں یہ شرح 65 فیصد تھی۔
یہ پیش رفت اس بات کی نشاندہی کرتی ہے کہ اقتصادی تنوع کے پروگراموں اور غیر تیل شعبوں کو فروغ دینے کی حکومتی پالیسیوں کے مثبت نتائج سامنے آ رہے ہیں۔