جی سی سی کے سیکریٹری جنرل جاسم محمد البدوی سے پاکستانی وزیر خارجہ محمد اسحاق ڈار نے ٹیلیفونک رابطہ کیا ہے۔
رابطے کے دوران خطے کی سنگین صورتحال اور غیر معمولی حالات پر تبادلہ خیال کیا گیا، جنہوں نے سیکورٹی، استحکام، ریاستوں کی خودمختاری اور علاقائی یکجہتی پر اثر ڈالا ہے۔
پاکستانی وزیر خارجہ نے پاکستان کی جانب سے جی سی سی کی ریاستوں پر حملوں کی مذمت کی اور کہا ہے کہ پاکستان کسی بھی ایسے اقدام کی حمایت نہیں کرے گا جو سلامتی اور عوام کی حفاظت کو خطرے میں ڈالے۔
ایران، امریکہ جنگ: اپ ڈیٹ رہنے کے لیے کلک کریں
جی سی سی کے سیکریٹری جنرل نے اس موقع پر تاریخی اور مضبوط خلیجی، پاکستانی تعلقات پر زور دیا اور کہا کہ پاکستان کا موقف خلیجی ممالک کی سیکورٹی اور استحکام کے لیے مضبوط دوستی اور تعاون کی بنیاد پر ہے۔
دونوں فریقوں نے ایرانی فوجی کارروائیوں کے فوری خاتمے اور خطے میں کسی بھی قسم کے تصادم یا کشیدگی کو روکنے پر اتفاق کیا، نیز بین الاقوامی قانون اور اقوام متحدہ کے چارٹر کے احترام کی اہمیت کو اجاگر کیا تاکہ ریاستوں کی خودمختاری، علاقائی سلامتی اور استحکام قائم رہے۔