وزارت حج و عمرہ نے معتمرین کو خدمات فراہم کرنے والی 4 کمپنیوں کی سرگرمیاں معطل کر دی ہیں۔
مزید پڑھیں
حکام کے مطابق یہ اقدام تب کیا گیا جب متعلقہ کمپنیوں کی جانب سے عازمین عمرہ کے انتظامات میں متعدد خلاف ورزیاں سامنے آئیں۔
وزارت نے کہا کہ یہ کارروائی خدمات فراہم کرنے والے اداروں کی جانب سے مقررہ ضابطوں اور ہدایات پر عمل درآمد کو یقینی بنانے اور معتمرین و زائرین کو بہتر سہولیات فراہم کرنے کے لیے کی گئی ہے۔
بیان کے مطابق 2 کمپنیوں پر یہ الزام سامنے آیا کہ انہوں نے عازمین
عمرہ کے گروپوں کے بارے میں غلط اور غیر درست فہرستیں فراہم کیں۔
وزارت کے مطابق یہ عمل واضح طور پر ان قواعد و ضوابط کی خلاف ورزی ہے جو عمرہ زائرین کی نقل و حرکت اور انتظامات کو منظم رکھنے کے لیے مقرر کیے گئے ہیں۔
اسی طرح 2 دیگر کمپنیوں کے بارے میں بتایا گیا کہ انہوں نے عازمین عمرہ کی رہائش کے انتظامات مقررہ طریقہ کار کے مطابق نہیں کیے۔
کمپنیوں نے زائرین کو ان رہائشی انتظامات کے مطابق جگہ فراہم نہیں کی جو پہلے سے منظور شدہ تھے، جسے قوانین کی صریح خلاف ورزی قرار دیا گیا۔
وزارت نے کہا کہ یہ اقدامات سعودی قیادت کی ہدایات اور سعودی عرب کے وژن 2030 کے اہداف کے مطابق کیے جا رہے ہیں تاکہ حرمین شریفین آنے والے زائرین کو اعلیٰ معیار کی خدمات فراہم کی جا سکیں۔
عمرہ خدمات فراہم کرنے والی تمام کمپنیوں اور اداروں کو خبردار کیا گیا ہے کہ وہ مقررہ ضوابط اور ہدایات پر مکمل عمل کریں۔
وزارت کے مطابق کسی بھی کمپنی کی جانب سے قانونی یا معاہداتی ذمہ داریوں میں کوتاہی کو برداشت نہیں کیا جائے گا۔