المسجد الحرام میں ہفتہ 4 رمضان کو ایک دن میں 9 لاکھ 4 ہزار سے زائد افراد نے عمرہ ادا کیا ہے۔
یہ منظر ماہِ مبارک کے ابتدائی ایام میں غیر معمولی رش اور شوقِ عبادت کی عکاسی کرتا ہے، جہاں جامع انتظامی خدمات کے ذریعے زائرین کی آمد و رفت کو نہایت منظم اور سہل بنایا گیا۔
مزید پڑھیں
سبق ویب سائٹ کے مطابق حرمین شریفین انتظامیہ نے 24 گھنٹے مربوط عملی منصوبوں کے تحت اپنی خدمات جاری رکھے ہوئے ہے۔
ان منصوبوں میں ہجوم کا مؤثر انتظام، طواف اور سعی کے راستوں کی منظم ترتیب، صفائی اور جراثیم کشی کے کاموں میں اضافہ، نیز مختلف زبانوں میں رہنمائی اور آگاہی خدمات کی فراہمی شامل ہے تاکہ زائرین اطمینان اور سہولت کے ساتھ مناسک ادا کر سکیں۔
انتظامیہ نے واضح کیا ہے کہ رجسٹرڈ اعداد و شمار ان وسیع انتظامات اور انسانی و تکنیکی وسائل کے بھرپور استعمال کا مظہر ہیں، جو زائرین کی خدمت کے لیے اعلیٰ معیار اور مؤثر عملی کارکردگی کے مطابق بروئے کار لائے جا رہے ہیں۔
یہ تمام اقدامات باقاعدہ منصوبہ بندی کے تحت ہجوم کے نظم و نسق، سلامتی اور روانی کو یقینی بنانے کے لیے انجام دیے جا رہے ہیں۔
انتظامیہ نے بتایا ہے کہ متعلقہ اداروں کے ساتھ مکمل ہم آہنگی کے ذریعے زائرین کو ایک ہمہ جہت روحانی تجربہ فراہم کیا جا رہا ہے۔
رمضان کے باقی ایام خصوصاً آخری عشرے میں معتمرین کی تعداد میں متوقع اضافے کے پیش نظر تیاریوں اور استعداد کار میں مزید اضافہ کیا جا رہا ہے۔
یہ کاوشیں حرمین شریفین اور ان کے زائرین کی خدمت کے حوالے سے مملکت کے مستقل عزم کا تسلسل ہیں، جن کا مقصد معتمرین کو ایک پُرامن، محفوظ اور سازگار ماحول فراہم کرنا ہے تاکہ وہ سکون و اطمینان کے ساتھ اپنی عبادات انجام دے سکیں۔