جدہ میونسپلٹی نے یوم التاسیس کے موقع پر کئی دنوں پر مشتمل ایک جامع پروگرام کی منظوری دی ہے، جس کے تحت شہر کے مختلف حصوں میں مرکزی شاہراہوں، چوراہوں، دروازوں اور باغات کو سعودی عرب کے پرچم سے سجایا گیا ہے۔
مزید پڑھیں
سعودی پریس ایجنسی کے مطابق پروگرام میں اہم شاہراہوں پر جھنڈوں کی تنصیب، یومِ تاسیس کی شناخت پر مبنی روشنیوں اور مجسموں کی تیاری و تنصیب شامل ہے۔
اس کے علاوہ جدہ کے دروازوں کو آراستہ کیا گیا اور مبارک باد کے پیغامات نشر کرنے کے لیے اسکرینوں اور اشتہاری بورڈز کو فعال کیا گیا تاکہ اس موقع کی بصری شناخت کو مزید اجاگر کیا جا سکے۔
ہدف بنائے گئے مقامات میں متعدد چوراہے، مرکزی سڑکیں، کورنیش اور شہر کے داخلی دروازے شامل ہیں، جہاں تزئین و آرائش اور تنصیب کے کام طے شدہ شیڈول کے مطابق انجام دیے گئے۔
مزید برآں امیر ماجد پارک میں آج 22 فروری کو تقریبات منعقد ہوں گی، جن میں بازوں اور گھوڑوں کے گوشے، دستکاریوں کی نمائش، بچوں کے لیے سرگرمیاں، مصوری اور حنا کے پروگرام شامل ہیں۔
میونسپلٹی نے اس امر کو یقینی بنایا ہے کہ پروگرام یوم التاسیس کی تاریخی گہرائی کو اجاگر کرے اور قومی شناخت پر فخر کے مظاہر کو تقویت دے۔
اس مقصد کے لیے فنی اور عملی وسائل بروئے کار لاتے ہوئے جدہ کو ایک ایسے انداز میں پیش کیا جائے گا جو اس عظیم موقع کے شایانِ شان ہو۔