خیراتی کاموں کی قومی مہم کے چھٹے ایڈیشن کے پہلے ہی روز عطیات کی مجموعی مالیت 646 ملین ریال سے تجاوز کر گئی۔ یہ مہم جمعہ کی شام باضابطہ طور پر شروع ہوئی ، جس میں تمام عطیات احسان پلیٹ فارم کے ذریعے موصول ہوئے۔
مزید پڑھیں
اخبار 24 کے مطابق خادم الحرمین الشریفین شاہ سلمان بن عبدالعزیز آل سعود اور ولی عہد و وزیراعظم شہزادہ محمد بن سلمان بن عبدالعزیز آل سعود نے مہم کے آغاز پر مجموعی طور پر 70 ملین ریال کے دو عطیات پیش کیے۔
اس کے علاوہ متعدد کمپنیوں اور فلاحی اداروں نے مہم میں بھی بڑھ چڑھ کر حصہ لیا، جن میں محمد ابراہیم السبیعی اینڈ سنز فاؤنڈیشن
’غروس‘، سعودی ارامکو، پروگرام الفوزان لخدمة المجتمع، روشن گروپ، مجموعة مفرح، سلیمان الراجحی فاؤنڈیشن، اوقاف محمد الراجحی، النهدي ہیومینیٹیرین فاؤنڈیشن اور سابک سمیت دیگر ادارے شامل ہیں۔
یہ قومی مہم جدید ڈیجیٹل گورننس کے تحت چلائی جا رہی ہے، جس کا مقصد معاشرے کو مستند اور محفوظ سرکاری ذرائع کے ذریعے عطیات دینے کی سہولت فراہم کرنا ہے۔
واضح رہے کہ احسان پلیٹ فارم مختلف سماجی اور فلاحی پروگراموں کے لیے شفاف اور منظم انداز میں خدمات مہیا کرتا ہے۔
احسان پلیٹ فارم سعودی ڈیٹا و مصنوعی ذہانت اتھارٹی ’سدايا‘ کے تعاون سے کام کر رہا ہے اور اسے قیادت کی مسلسل سرپرستی حاصل ہے۔
پلیٹ فارم اعلیٰ سطح کی گورننس کے تحت عطیات کی وصولی اور ان کی مستحقین تک ترسیل کو یقینی بناتا ہے، جبکہ ایک شرعی کمیٹی اس بات کی نگرانی کرتی ہے کہ تمام سرگرمیاں اسلامی شریعت کے مطابق انجام دی جائیں۔