رمضان المبارک 1447ھ کے آغاز کے حوالے سے عرب اور اسلامی ممالک میں مختلف اعلانات سامنے آئے ہیں، جس کے نتیجے میں کئی ممالک میں پہلا روزہ بدھ کو رکھا جا رہا ہے جبکہ بعض ریاستوں نے جمعرات کو ماہِ صیام کا آغاز قرار دیا ہے۔ اسی طرح چند ممالک ایسے بھی ہیں جہاں آج بدھ کی شام چاند دیکھنے کا اہتمام کیا جا رہا ہے اور وہاں رمضان کے جمعہ سے شروع ہونے کا امکان بھی موجود ہے۔
مزید پڑھیں
اخبار 24 کے مطابق سعودی عرب، قطر، کویت، بحرین، امارات، عراق، لبنان، فلسطین، یمن، صومالیہ، سوڈان اور جبوتی نے رمضان کا چاند نظر آنے کی تصدیق کرتے ہوئے بدھ کے روز یکم رمضان کا اعلان کیا۔
دوسری جانب مصر، شام، اردن، تیونس، الجزائر، لیبیا اور انڈونیشیا نے چاند نظر نہ آنے کا اعلان کرتے ہوئے کہا ہے کہ ان کے ہاں جمعرات کو پہلا روزہ ہوگا۔
یہی تاریخ ان ممالک میں بھی مقرر کی گئی ہے جو فلکی حسابات کی بنیاد پر اسلامی مہینوں کا تعین کرتے ہیں، جن میں سلطنتِ عمان، ترکیہ، ایران، سنگاپور اور ملائیشیا شامل ہیں۔
علاوہ ازیں کچھ ممالک میں صورت حال مختلف ہے۔ ایران، مراکش، موریطانیہ اور پاکستان میں بدھ کی شام ہلال کی تلاش کی گئی کیوں کہ ان کے ہاں منگل کو شعبان کی 28 ویں تاریخ تھی۔
ان ممالک میں شعبان کا مہینہ دیگر ریاستوں کے مقابلے میں ایک دن تاخیر سے شروع ہوا تھا، جس کے باعث کیلنڈر میں فرق پیدا ہوا۔ اسی بنا پر وہاں اس بات کا امکان اگرچہ کم ہی سہی، موجود ہے کہ رمضان المبارک کا آغاز جمعہ سے ہو۔
اس طرح رمضان 1447ھ کا آغاز ایک بار پھر مختلف ممالک میں مختلف دنوں سے ہو رہا ہے، جس کی بنیادی وجہ چاند کی رویت اور فلکی حسابات کے طریقہ کار میں فرق ہے۔