سعودی فلم فیسٹیول نے اپنے 12ویں ایڈیشن کا اعلان کیا ہے، جو 23 سے 29 اپریل 2026 تک الظہران میں واقع مرکزِ شاہ عبدالعزیز ثقافتی مرکز (اثرا) میں منعقد ہوگا۔
اس سال فیسٹیول کا مرکزی موضوع ’سفر کا سنیما‘ رکھا گیا ہے، جس کے تحت تبدیلی، سفر اور انسانی تجربے کو سنیما کے ذریعے اجاگر کیا جائے گا۔ یہ فیسٹیول سنیما ایسوسی ایشن کے زیر اہتمام، اثرا کے اشتراک اور فلم کمیشن کی معاونت سے منعقد کیا جا رہا ہے۔
سفر بطور داستان
اس ایڈیشن میں عرب اور عالمی سنیما کی مختصر اور طویل فلموں کی نمائش کی جائے گی، جن میں ’روڈ موویز‘ سمیت وہ تمام فلمیں شامل ہوں گی جہاں سفر محض ایک جغرافیائی حرکت نہیں بلکہ کہانی کا مرکزی محرک ہو۔
منتظمین کے مطابق اس موضوع کا انتخاب اس لیے کیا گیا ہے تاکہ ہر فلمی تجربہ ایک منفرد سفر کے طور پر دیکھا جائے۔ ایسا سفر جس میں شناخت، مقام اور وقت ایک دوسرے سے جڑ کر انسانی تجربے کو مجسم کرتے ہیں۔
سعودی فلم سازوں کے لیے تخلیقی موقع
فیسٹیول انتظامیہ کے مطابق ’سفر کا سنیما‘کا محور سعودی فلم سازوں کو اپنی ذاتی کہانیوں اور تجربات کو نئے زاویوں سے پیش کرنے کی ترغیب دے گا۔ اس دوران سفر کو محض نقل و حرکت کے بجائے فکری اور جذباتی تبدیلی کے استعارے کے طور پر بھی پیش کیا جائے گا، جس سے مقامی تخلیقی صلاحیتوں کو وسعت ملے گی۔
عالمی سنیما کے ساتھ مکالمہ
سعودی فلم فیسٹیول گزشتہ برسوں میں بھارتی اور جاپانی سنیما پر خصوصی پروگرام پیش کر چکا ہے اور اس بار فیسٹیول میں ’کورین سنیما پر اسپاٹ لائٹ‘کے عنوان سے خصوصی پروگرام شامل کیا گیا ہے، جس میں کورین سنیما کی اس کامیاب مثال کو پیش کیا جائے گا جس نے مضبوط مقامی شناخت کے ساتھ عالمی سطح پر اثر چھوڑا ہے۔
یہ اقدام عالمی ثقافتی مکالمے کو فروغ دینے اور سعودی فلم سازوں کو بین الاقوامی تجربات سے روشناس کرانے کا حصہ ہے۔
منتظمین کیا کہتے ہیں؟
فیسٹیول کے بانی اور ڈائریکٹر احمد الملا نے اس حوالے سے کہا کہ یہ سالانہ پروگرام ایک ’سنیمائی تقریب‘کی مانند ہے، جہاں فلم ساز اور شائقین ایک ہی چھت تلے جمع ہوتے ہیں۔ انہوں نے کہا کہ فیسٹیول کے دروازے تمام تخلیق کاروں کے لیے کھلے ہیں اور فلم ساز ہی اس تقریب کے اصل ستارے ہیں۔
دوسری جانب فیسٹیول کے نائب ڈائریکٹر طارق الخواجی نے اثرا اور سنیما ایسوسی ایشن کے درمیان جاری شراکت کو فیسٹیول کی کامیابی کا اہم عنصر قرار دیا۔
انہوں نے کہا کہ یہ تعاون ہر سال موضوعات کی وسعت اور پروگراموں کے تنوع میں نمایاں اضافہ کر رہا ہے، جس سے مقامی فلم سازوں کو عالمی منظرنامے تک رسائی مل رہی ہے۔
ترقی کا مسلسل سفر
طارق الخواجی نے کہا کہ فیسٹیول ہر سال انتظامات، شرکا کی تعداد اور صنعت سے وابستہ افراد کی دلچسپی کے لحاظ سے ترقی کر رہا ہے۔ اسی لیے ہر پہلو پر توجہ دینا ضروری سمجھا جاتا ہے تاکہ یہ ایونٹ مقامی اور عرب فلمی برادری کی توقعات پر پورا اتر سکے۔
2008 سے اب تک
2008ء میں آغاز کے بعد سے اب تک سعودی فلم فیسٹیول مملکت اور خلیجی خطے میں سنیما کے فروغ کا ایک مؤثر پلیٹ فارم بن چکا ہے۔ یہ نہ صرف فیچر اور دستاویزی فلموں کے مقابلے منعقد کرتا ہے بلکہ علمی نشستیں اور مکالمے، پروڈکشن مارکیٹ کے ساتھ ساتھ تخلیقی تربیتی پروگرام بھی پیش کرتا ہے، جس سے فلم سازوں کی فنی مہارت میں اضافہ اور ان کے کام کو عالمی سطح پر جوڑنے میں مدد ملتی ہے۔
12واں سعودی فلم فیسٹیول محض فلموں کی نمائش نہیں بلکہ ایک فکری اور ثقافتی سفر ہوگا، جہاں کہانیاں سرحدوں سے آگے بڑھ کر مشترکہ انسانی تجربات کو بیان کریں گی۔
’سفر کا سنیما‘ کے عنوان سے یہ ایڈیشن اس بات کا اعادہ کرے گا کہ سنیما خود بھی ایک سفر ہے۔ خیال سے پردۂ سیمیں تک اور مقامی منظرنامے سے عالمی افق تک۔