مصری دارالافتا نے اعلان کیا ہے کہ رواں سال رمضان المبارک کے چاند کی رویت کی مرکزی تقریب براہِ راست نشر کی جائے گی، جس کے ذریعے عوام سرکاری اعلان کو براہِ راست دیکھ سکیں گے۔
مزید پڑھیں
ادارے کے مطابق رویت ہلال کی کارروائی آئندہ منگل کو منعقد ہوگی، جس کے لیے خصوصی براہ راست نشریات کا اہتمام کیا گیا ہے۔
دارالافتا کے بیان میں کہا گیا ہے کہ رمضان کے چاند کی رویت کے لیے ملک بھر میں 7 شرعی و سائنسی کمیٹیاں تشکیل دی گئی ہیں جو مختلف صوبوں اور علاقوں کا احاطہ کریں گی۔
ان کمیٹیوں میں دارالافتا، مصری محکمہ سروے اور قومی ادارہ برائے
فلکیاتی تحقیق کے ماہرین شامل ہوں گے جو شرعی اصولوں اور سائنسی معیار کے مطابق چاند دیکھنے کی تصدیق کریں گے۔
ادارے نے واضح کیا کہ رویت ہلال کا حتمی نتیجہ براہِ راست نشر کیا جائے گا تاکہ عوام رمضان کی آمد کا سرکاری اعلان خود سن سکیں۔
دارالافتا کے مطابق اعلانِ رویت کے ساتھ ایک خصوصی پروگرام بھی نشر ہوگا جس میں مذہبی اور ابلاغی سرگرمیاں شامل ہوں گی۔ اس موقع پر رمضان کی تیاری، روحانی اہمیت اور دینی پیغامات کو اجاگر کیا جائے گا تاکہ عوام اس مقدس مہینے کا استقبال عقیدت و احترام سے کر سکیں۔
فلکیاتی ماہر ڈاکٹر محمد غریب نے کہا ہے کہ رمضان کے آغاز کی سرکاری تاریخ کا اعلان کرنا مصر کے مفتی اعظم کا خصوصی اختیار ہے اور یہ اعلان شرعی ضوابط کے مطابق چاند نظر آنے یا نہ آنے کی بنیاد پر کیا جاتا ہے۔
انہوں نے بتایا کہ فلکیاتی اندازوں کے مطابق شعبان کے 30 دن مکمل ہونے کا امکان ہے جبکہ سائنسی حساب سے رمضان کا پہلا دن 19 فروری متوقع ہے، تاہم حتمی فیصلہ صرف شرعی رویت کے بعد ہی کیا جائے گا۔
ماہرین کے مطابق رویت کے روز چاند کا قیام قاہرہ میں تقریباً 3 منٹ جبکہ دیگر علاقوں میں 4 منٹ تک متوقع ہے، جو اگرچہ مختصر دورانیہ ہے لیکن اس میں چاند نظر آنے کے قوی امکانات موجود ہیں۔ اس کے باوجود سرکاری اعلان کا انحصار صرف دارالافتا کی شرعی تصدیق پر ہوگا، جس کے بعد ہی رمضان المبارک کے آغاز کا باضابطہ اعلان کیا جائے گا۔