ایران جنگ اور وسط مدتی انتخابات میں ریپبلکن پارٹی کی شکست کے بعد امریکی وزیر دفاع پیٹ ہیگستھ کے مواخذے کی کوششیں تیز ہوگئیں۔
ریپبلکن رکن تھامس میسی آئندہ ہفتے ایوانِ نمائندگان میں ووٹنگ کرانے کی تیاری کر رہے ہیں۔
امریکہ میں وزیر دفاع پیٹ ہیگستھ کو عہدے سے ہٹانے کی کوششیں تیز ہوگئی ہیں۔
کانگریس کے وسط مدتی انتخابات میں ریپبلکن پارٹی کی شکست کے بعد وزیر دفاع پر ایران جنگ کے دوران آئینی اختیارات سے تجاوز کرنے کے الزامات میں شدت آگئی ہے، جبکہ صدر ڈونلڈ ٹرمپ کی فوجی پالیسیوں پر بھی سوالات اٹھائے جا رہے ہیں۔
امریکی میڈیا کے مطابق ایوانِ نمائندگان میں آئندہ ہفتے ہیگستھ کے مواخذے کی قرارداد پر ووٹنگ کا امکان ہے۔
اس اقدام کی قیادت ریپبلکن رکنِ کانگریس تھامس میسی کر رہے ہیں، جنہوں نے اعلان کیا ہے کہ اگر وزیر دفاع مستعفی نہ ہوئے تو وہ ان کے خلاف 8 الزامات پر مشتمل قرارداد دوبارہ پیش کریں گے۔
مزید پڑھیں
ریپبلکن پارٹی کے اندر اختلافات
اس پیش رفت کی اہمیت اس لیے بھی زیادہ ہے کہ مواخذے کی تحریک خود ریپبلکن پارٹی کے ایک رکن نے شروع کی ہے، جس سے ایران جنگ اور صدارتی اختیارات کے معاملے پر حکمران جماعت کے اندر اختلافات نمایاں ہوگئے ہیں۔
تھامس میسی نے پہلی مرتبہ 15 ستمبر کو وزیر دفاع کے خلاف قرارداد
پیش کی تھی، تاہم انتخابی تعطیلات کے باعث اس پر ووٹنگ نہیں ہوسکی۔
3 نومبر کے انتخابی نتائج کے بعد انہوں نے اعلان کیا کہ کانگریس کے اجلاس دوبارہ شروع ہوتے ہی قرارداد کو ووٹنگ کے لیے پیش کیا جائے گا۔
وزیر دفاع پر 8 الزامات
مواخذے کی قرارداد میں ہیگستھ کے خلاف آٹھ الزامات عائد کئے گئے ہیں، جن میں تین براہِ راست ایران کے خلاف امریکی جنگ سے متعلق ہیں۔
میسی کا الزام ہے کہ وزیر دفاع نے کانگریس کی منظوری کے بغیر فوجی کارروائیوں میں حصہ لیا اور 1973 کے وار پاورز ایکٹ کے تحت عائد پابندیوں کو نظرانداز کیا۔
دیگر الزامات میں شہریوں کے تحفظ سے متعلق قانونی ذمہ داریوں کی خلاف ورزی، منشیات کی اسمگلنگ میں مبینہ طور پر ملوث کشتیوں پر حملے اور ڈیموکریٹ سینیٹر مارک کیلی کے خلاف محکمہ دفاع کے اختیارات استعمال کرنا شامل ہیں۔
قرارداد میں وینزویلا اور یمن میں امریکی فوجی کارروائیوں سے متعلق فیصلوں پر بھی اعتراضات اٹھائے گئے ہیں۔
تاہم یہ الزامات ابھی ثابت نہیں ہوئے اور امریکی محکمہ دفاع نے انہیں مسترد کرتے ہوئے اپنی کارروائیوں کو قانونی قرار دیا ہے۔
ایران جنگ انتخابی شکست کی وجہ؟
وزیر دفاع کے خلاف تحریک ایسے وقت میں سامنے آئی ہے جب ایران جنگ کے سیاسی اور معاشی اثرات امریکہ میں شدید بحث کا موضوع بنے ہوئے ہیں۔
رپورٹس کے مطابق 28 فروری کو شروع ہونے والی جنگ کے تسلسل، ایندھن کی بڑھتی قیمتوں اور معاشی دباؤ نے ریپبلکن انتظامیہ کے خلاف عوامی ناراضی میں اضافہ کیا۔
3 نومبر کے وسط مدتی انتخابات میں ڈیموکریٹس نے نمایاں کامیابیاں حاصل کیں اور نئی کانگریس میں اکثریت حاصل کرنے میں کامیاب رہے۔
صدر ٹرمپ نے بھی تسلیم کیا کہ ایران جنگ نے انتخابی نتائج پر اثر ڈالا، جبکہ نائب صدر جے ڈی وینس نے ریپبلکن پارٹی کی شکست کی ایک بڑی وجہ جنگ کو قرار دیا۔
امریکی میڈیا کے مطابق ہیگستھ ایران کے خلاف فوجی کارروائیوں کے نمایاں حامی تھے، تاہم جنگ کی مدت اور نتائج سے متعلق ان کے ابتدائی اندازے درست ثابت نہیں ہوئے۔
صدر ٹرمپ کی
حمایت کے
باوجود ہیگستھ
کے مستقبل
پر سوالات
اٹھنے لگے
ٹرمپ کی حمایت، مگر مستقبل غیر یقینی
بڑھتے ہوئے سیاسی دباؤ کے باوجود صدر ڈونلڈ ٹرمپ نے وزیر دفاع کی حمایت جاری رکھی ہے۔ٹرمپ کا کہنا ہے کہ ہیگستھ اپنی ذمہ داریاں اچھی طرح انجام دے رہے ہیں اور انہیں ہٹانے کا کوئی فیصلہ نہیں کیا گیا۔
تاہم وال اسٹریٹ جرنل کے مطابق صدر نے اپنے بعض قریبی اتحادیوں سے وزیر دفاع کے مستقبل کے بارے میں مشاورت کی ہے، جس سے ان کی عہدے پر موجودگی کے حوالے سے سوالات بڑھ گئے ہیں۔
دوسری جانب محکمہ دفاع نے واضح کیا ہے کہ ہیگستھ سیاسی دباؤ کے باوجود اپنی ذمہ داریاں جاری رکھیں گے۔
امریکی آئین کے مطابق ایوانِ نمائندگان سادہ اکثریت سے کسی وفاقی عہدیدار کے مواخذے کی منظوری دے سکتا ہے، لیکن اس فیصلے سے فوری برطرفی نہیں ہوتی۔
اس کے بعد معاملہ سینیٹ میں جاتا ہے، جہاں وزیر دفاع کو عہدے سے ہٹانے کے لیے موجود ارکان کی دو تہائی اکثریت سے الزامات کی توثیق ضروری ہے۔
سیاسی مبصرین کے مطابق وزیر دفاع کے خلاف موجودہ کارروائی صرف ایک عہدیدار کے مستقبل کا معاملہ نہیں بلکہ صدارتی اختیارات، ایران جنگ اور کانگریس کی نگرانی کے کردار سے بھی جڑی ہوئی ہے۔
جنوری میں نئی کانگریس کے قیام کے بعد ایران جنگ اور محکمہ دفاع کے فیصلوں کی تحقیقات میں مزید تیزی آسکتی ہے۔
یوں وزیر دفاع کے مواخذے کی کوشش وسط مدتی انتخابات کے بعد ٹرمپ انتظامیہ کے لیے ایک اہم سیاسی امتحان بن گئی ہے، جس کے اثرات امریکی خارجہ اور دفاعی پالیسیوں تک پہنچ سکتے ہیں۔