فرانس کے کم آمدنی والے مضافاتی علاقوں سے شروع ہونے والے طلبہ احتجاج پورے ملک میں پھیل گئے ہیں۔
مظاہرین کا کہنا ہے کہ مسئلہ صرف اساتذہ اور وسائل کی کمی نہیں بلکہ امیر اور غریب علاقوں کے طلبہ کو ملنے والے تعلیمی مواقع میں واضح فرق ہے۔
پیرس کے مضافاتی علاقوں کے چند اسکولوں سے اٹھنے والی آواز اب پورے فرانس میں گونج رہی ہے۔
کہیں اسکول کے دروازوں پر رکاوٹیں کھڑی ہیں، کہیں طلبہ کلاسوں کا بائیکاٹ کر رہے ہیں اور کہیں ہزاروں نوجوان اساتذہ اور والدین کے ساتھ سڑکوں پر نکل آئے ہیں۔
بظاہر مطالبات سادہ ہیں:
استاد پورے ہوں، کلاسیں کم بھری ہوں، عمارتیں بہتر ہوں اور تعلیم کے لیے زیادہ وسائل فراہم کیے جائیں۔
مگر اس احتجاج کے پیچھے ایک کہیں بڑا سوال چھپا ہے—کیا فرانس کے تمام بچوں کو واقعی یکساں تعلیم اور یکساں مستقبل میسر ہے؟
آج منگل 6 اکتوبر کو یہ تحریک اپنی اب تک کی سب سے بڑی قومی کارروائیوں میں تبدیل ہوگئی۔
ایسوسی ایٹڈ پریس کے مطابق ملک بھر میں ڈھائی لاکھ سے زیادہ افراد مظاہروں میں شریک ہوئے، جبکہ وزارتِ تعلیم کے مطابق 891 ہائی اسکولوں میں تدریس مکمل یا جزوی طور پر متاثر ہوئی۔
طلبہ کے ساتھ اساتذہ، والدین، تعلیمی یونینیں اور یونیورسٹی طلبہ بھی میدان میں آگئے۔
مزید پڑھیں
ایک اسکول سے شروع ہونے والی چنگاری
اس تحریک کی ابتدا کسی بڑی سیاسی جماعت یا قومی یونین کے اعلان سے نہیں ہوئی۔
21 ستمبر کو پیرس کے مضافاتی شہر Créteil کے ایک ہائی اسکول میں طلبہ نے خالی تدریسی آسامیوں اور ناکافی وسائل کے خلاف احتجاج شروع کیا۔
صرف 10 دن کے اندر یہی شکایت دوسرے مضافاتی اسکولوں تک پہنچی اور پھر فرانس کے مختلف شہروں میں پھیل گئی۔ فرانس کا معروف اور بااثر اخبارLe Monde نے اسے کئی دہائیوں میں فرانسیسی ہائی اسکول طلبہ کی نمایاں ترین خود رو تحریکوں میں شمار کیا ہے۔
یہی اس احتجاج کی اصل اہمیت ہے۔
نوجوان کسی ایک نئے قانون کی مخالفت نہیں کر رہے بلکہ اس نظام کے خلاف بول رہے ہیں جس کے مسائل ان کے مطابق برسوں سے جمع ہوتے چلے آئے ہیں۔
مضافاتی علاقوں میں مسئلہ زیادہ سنگین کیوں ہے؟
پیرس کا مرکزی حصہ اور اس کے گرد پھیلے کم آمدنی والے مضافاتی علاقے جغرافیائی طور پر ایک دوسرے سے زیادہ دور نہیں، مگر احتجاجی طلبہ کا کہنا ہے کہ تعلیم کے میدان میں دونوں کے درمیان فاصلہ کہیں زیادہ بڑا ہے۔
Pantin کے ایک ووکیشنل ہائی اسکول کے 17 سالہ طالب علم نے Le Monde کو بتایا کہ اس کے اسکول میں بیت الخلا اکثر بند رہتے ہیں، مستقل نرس دستیاب نہیں اور غیر حاضر اساتذہ کا متبادل ہمیشہ فراہم نہیں کیا جاتا۔
اس کا کہنا تھا کہ ایسے حالات میں اچھی تعلیم حاصل کرنا مشکل ہے اور یہی چیز اسے اپنے مستقبل کے بارے میں فکرمند کرتی ہے۔
یہ شکایت محض ایک اسکول کی نہیں۔
تحریک کے مرکز بننے والے عوامی مضافاتی علاقوں میں طلبہ مسلسل اساتذہ اور طبی عملے کی کمی، خستہ عمارتوں، بھری ہوئی کلاسوں اور ناکافی سہولتوں کا ذکر کر رہے ہیں۔
یہاں سے احتجاج کا سوال وسائل سے بڑھ کر برابری تک پہنچ جاتا ہے۔
’پیرس کے بچوں سے ہمارے مواقع کم کیوں؟‘
4 اکتوبر کو Saint-Denis میں ہونے والے ایک اجتماع میں یہی احساس کھل کر سامنے آیا۔
مقامی ہائی اسکول کی ایک طالبہ نے سوال کیا کہ مضافاتی علاقوں کے بچوں کے مواقع پیرس میں پڑھنے والے بچوں سے کم کیوں ہونے چاہئیں۔
وہاں موجود دوسرے طلبہ نے بھی تعلیم، سماجی امتیاز اور مستقبل کے مواقع کو ایک ہی مسئلے کے مختلف پہلو قرار دیا۔
یہی وہ نکتہ ہے جس نے موجودہ احتجاج کو عام تعلیمی ہڑتال سے مختلف بنا دیا ہے۔
اگر ایک طالب علم ایسے اسکول میں پڑھتا ہے جہاں استاد باقاعدگی سے دستیاب نہیں، عمارت اور بنیادی سہولتیں ناقص ہیں اور کلاسیں حد سے زیادہ بھری ہوئی ہیں، جبکہ دوسرے طالب علم کو نسبتاً بہتر ماحول میسر ہے، تو دونوں سے ایک ہی امتحان اور ایک ہی یونیورسٹی داخلہ نظام میں مساوی کارکردگی کی توقع کیسے کی جا سکتی ہے؟
طلبہ اب اسی تضاد پر سوال اٹھا رہے ہیں۔
اساتذہ، طبی
عملے اور
بنیادی سہولتوں
کی کمی اہم
شکایات ہیں
احتجاج کا ایک بڑا ہدف فرانس کا یونیورسٹی داخلہ پلیٹ فارم Parcoursup بھی بن گیا ہے۔طلبہ کے مظاہروں میں ایسے نعرے نمایاں ہیں جن میں وہ کہتے ہیں کہ وہ محض کمپیوٹر میں موجود ڈیٹا نہیں۔
ان کا مطالبہ ہے کہ یونیورسٹی میں داخلے کا نظام زیادہ شفاف اور منصفانہ بنایا جائے۔ حکومت نے بھی اب Parcoursup کی شفافیت کو ان 5 شعبوں میں شامل کر لیا ہے جن پر فوری کام کرنے کا وعدہ کیا گیا ہے۔
مضافاتی علاقوں کے طلبہ کے لیے Parcoursup کی بحث اس لیے زیادہ حساس ہے کہ ان کا استدلال ہے:
اگر اسکول ہی برابر نہیں تو اعلیٰ تعلیم کے لیے مقابلہ برابر کیسے ہوگا؟
تحریک کی دوسری اہم تبدیلی یہ ہے کہ احتجاج اب ان علاقوں تک محدود نہیں رہا جہاں سے یہ شروع ہوا تھا۔
6 اکتوبر کو Paris، Marseille، Lille، Lyon، Strasbourg، Toulouse، Rennes اور دوسرے شہروں میں مظاہرے ہوئے۔
پیرس کے معروف تعلیمی اداروں Louis-le-Grand اور Henri-IV میں بھی رکاوٹیں اور احتجاج دیکھنے میں آیا، جبکہ یونیورسٹی سطح پر بھی متعدد مقامات متاثر ہوئے۔
یعنی وہ مسئلہ جو ابتدا میں غریب مضافاتی علاقوں کی محرومی سمجھا جا رہا تھا، اب قومی تعلیمی نظام پر سوال میں تبدیل ہوچکا ہے۔
طلبہ یونینوں اور اعلیٰ تعلیم کی تنظیموں نے حکومت کے سامنے 10 ہنگامی اقدامات پر مشتمل مشترکہ پلیٹ فارم بھی پیش کردیا ہے۔
اس میں مختلف طلبہ تنظیمیں شامل ہیں اور مقصد حکومت کے ساتھ مذاکرات کے لیے مشترکہ بنیاد فراہم کرنا ہے۔
پولیس کارروائی نے سیاسی بحران بنا دیا
احتجاج جوں جوں پھیلا، متعدد شہروں میں پولیس اور مظاہرین کے درمیان جھڑپیں بھی بڑھتی گئیں۔
حکام کے مطابق تحریک شروع ہونے کے بعد 6 ہزار سے زیادہ افراد کو حراست میں لیا جا چکا ہے، جن میں بڑی تعداد کم عمر نوجوانوں کی ہے۔
Lens میں ایک 15 سالہ طالب علم ایک پولیس گرینیڈ کے دھماکے کے بعد ہاتھ سے محروم ہوگیا، جبکہ واقعے کی تحقیقات جاری ہیں۔
پولیس کے طرزِعمل کے بارے میں متعدد دیگر تحقیقات بھی شروع کی گئی ہیں۔
حکومت کا کہنا ہے کہ جائز تعلیمی مطالبات اور توڑ پھوڑ یا تشدد کو ایک نظر سے نہیں دیکھا جاسکتا۔
دوسری طرف طلبہ تنظیمیں اور بعض اساتذہ کہتے ہیں کہ سخت پولیس کارروائی نے اصل تعلیمی مسئلے کو مزید بھڑکا دیا ہے۔
حکومت نے اب سننا شروع کردیا ہے
شدید دباؤ کے بعد وزارتِ تعلیم نے Agora کے نام سے قومی مشاورت شروع کردی ہے، جو 23 اکتوبر تک جاری رہے گی۔
طلبہ سے دو بنیادی سوال پوچھے جا رہے ہیں:
اسکول میں ان کی سب سے بڑی مشکلات کیا ہیں اور بہتر تعلیم و زندگی کے لیے کیا تبدیل ہونا چاہیے؟
وزیراعظم کی جانب سے حکومت کو پانچ شعبوں پر کام کرنے کی ہدایت بھی دی گئی ہے: کلاسوں کا تسلسل یقینی بنانا، اسکول عمارتیں بہتر کرنا، روزانہ کے تعلیمی اوقات منظم کرنا، Parcoursup کو زیادہ شفاف بنانا اور طلبہ کی شکایات پر عملی کارروائی کرنا۔
یہ اس بات کا اشارہ ہے کہ حکومت نے احتجاج کو محض وقتی شور سمجھنے کے بجائے اس کے بنیادی اسباب سے نمٹنے کی ضرورت تسلیم کرنا شروع کردی ہے۔
اصل امتحان اب شروع ہوگا
فرانس میں اسکول احتجاج کا انجام ابھی واضح نہیں۔
مظاہرے ختم بھی ہوجائیں تو وہ سوال باقی رہے گا جس نے انہیں جنم دیا:
کیا ایک مضافاتی غریب علاقے کے طالب علم اور پیرس کے کسی خوشحال علاقے کے طالب علم کو حقیقتاً ایک جیسا تعلیمی موقع حاصل ہے؟
موجودہ تحریک نے استاد کی خالی آسامی، خراب بیت الخلا یا بھری ہوئی کلاس کو ایک بڑے قومی مسئلے سے جوڑ دیا ہے—تعلیم میں طبقاتی اور جغرافیائی عدم مساوات۔
یہی وجہ ہے کہ فرانس کا طلبہ احتجاج اب صرف اسکولوں کی چار دیواری کا مسئلہ نہیں رہا۔ یہ اس وعدے کا امتحان بن گیا ہے جسے فرانسیسی جمہوریہ اپنی بنیادی شناخت کا حصہ قرار دیتی ہے:
برابری۔