سعودی جنرل اتھارٹی آف اوقاف نے نامعلوم اور غیر فعال اوقاف کو دوبارہ فعال بنانے کے لیے نیا ضابطہ جاری کیا ہے۔ اس کے تحت ایسے وقف کی معتبر اطلاع اور ثبوت فراہم کرنے والے شخص کو وقف کی مالیت کے زیادہ سے زیادہ 5 فیصد تک انعام دیا جاسکتا ہے، تاہم انعام کی بالائی حد 10 ملین ریال ہوگی۔
ہر اطلاع پر انعام نہیں ملے گا بلکہ متعلقہ کمیٹی ثبوت، وقف کی مالیت اور اطلاع دینے والے کے کردار کا جائزہ لے گی۔
سعودی عرب میں نامعلوم یا برسوں سے غیر فعال پڑے اوقاف کی نشاندہی کرنے والوں کو اب 10 ملین ریال تک انعام مل سکتا ہے۔
سعودی جنرل اتھارٹی آف اوقاف کے نئے ضابطے کے مطابق معتبر معلومات اور ثبوت فراہم کرکے کسی نامعلوم وقف کو سامنے لانے والے شخص کو وقف کی مالیت کے زیادہ سے زیادہ 5 فیصد تک انعام دیا جاسکتا ہے، تاہم ایک کیس میں انعام کی بالائی حد 10 ملین ریال مقرر کی گئی ہے۔
اس اقدام کا مقصد ایسی وقف املاک اور اثاثوں کو دوبارہ فعال بنانا ہے جو برسوں سے غیر استعمال شدہ، نامعلوم یا اپنے اصل مقصد سے ہٹ چکے ہوں۔
نامعلوم وقف کیا ہے؟
ضابطے کے مطابق ایسے وقف کو نامعلوم وقف سمجھا جاسکتا ہے جس کا مصرف بند ہوچکا ہو اور اس پر کوئی ناظر، یعنی نگراں، موجود نہ ہو۔
اسی طرح اگر وقف پر قابض شخص یا ناظر نے اس حقیقت کو چھپا رکھا ہو کہ جائیداد وقف ہے، یا موجودہ ناظر کو خود وقف کی جگہ، اس کی ملکیت یا وقف سے متعلق دستاویزات کا علم نہ ہو تو ایسی صورت بھی نامعلوم وقف کے دائرے میں آسکتی ہے۔
یہ ضابطہ صرف زمین یا عمارت تک محدود نہیں بلکہ دوسرے منقولہ اور غیر منقولہ وقف اثاثوں پر بھی لاگو ہوسکتا ہے۔
10 ملین ریال کیسے ملیں گے؟
یہ سمجھنا ضروری ہے کہ ہر اطلاع پر 10 ملین ریال نہیں ملیں گے۔
متعلقہ کمیٹی پہلے وقف کی حقیقت، اطلاع دینے والے کے ثبوت اور وقف کی اصل مالیت کا جائزہ لے گی۔ اس کے بعد انعام کا تعین کیا جائے گا۔
قاعدے کے مطابق انعام وقف کی مالیت کے زیادہ سے زیادہ 5 فیصد تک ہوسکتا ہے، مگر 10 ملین ریال سے زیادہ نہیں ہوگا۔
مثال کے طور پر اگر کسی وقف کی مالیت 20 ملین ریال ثابت ہو تو 5 فیصد کے حساب سے انعام 10 لاکھ ریال تک ہوسکتا ہے۔
اگر وقف 100 ملین ریال کا ہو تو 50 لاکھ ریال تک، جبکہ 200 ملین ریال یا اس سے زیادہ کی مالیت پر زیادہ سے زیادہ حد 10 ملین ریال تک پہنچ سکتی ہے۔
تاہم پورے 5 فیصد کی ادائیگی لازمی نہیں۔
کمیٹی اس بات کو بھی دیکھے گی کہ اطلاع دینے والے نے کتنے مضبوط ثبوت فراہم کیے اور وقف کی بازیابی میں اس کا کردار کتنا اہم تھا۔
اطلاع دینے کے لیے کیا ضروری ہے؟
اطلاع ایسے وقف سے متعلق ہونی چاہئے جو پہلے سے جنرل اتھارٹی آف اوقاف کے علم میں نہ ہو۔
اطلاع دینے والے کو ایسے دستاویزات یا شواہد فراہم کرنا ہوں گے جو قانونی طور پر قابل قبول ہوں۔
اگر معاملہ کسی زمین یا جائیداد کا ہو تو اس کے مقام اور دستیاب ملکیتی یا وقف دستاویزات کی تفصیل بھی دینا ضروری ہوگی۔
اطلاع اتھارٹی کی ویب سائٹ یا اس کی مقرر کردہ سرکاری ذرائع سے دی جائے گی۔
اگر اسی وقف کے بارے میں پہلے ہی عدالت میں وقف ثابت کرنے، ناظر مقرر کرنے یا کسی دوسرے حق سے متعلق مقدمہ زیر سماعت ہو تو عام حالات میں ایسی اطلاع انعام کے لیے قبول نہیں کی جائے گی۔
اگر کئی افراد ایک ہی وقف کی اطلاع دیں؟
اگر ایک ہی وقف کے بارے میں ایک سے زیادہ افراد اطلاع دیں تو اصولی طور پر پہلے اطلاع دینے والے کو ترجیح دی جائے گی۔
تاہم اگر بعد میں اطلاع دینے والے شخص نے ایسے اہم شواہد فراہم کیے جو وقف کی شناخت یا بازیابی میں فیصلہ کن ثابت ہوں تو اتھارٹی اسے بھی انعام میں شریک کرسکتی ہے۔
انعام کی تقسیم میں ہر شخص کے ثبوت اور عملی کردار کا جائزہ لیا جائے گا۔
شناخت خفیہ رکھی جائے گی
ضابطے میں اطلاع دینے والے کی رازداری کی ضمانت بھی دی گئی ہے۔
جنرل اتھارٹی آف اوقاف اطلاع دینے والے کے ذاتی کوائف کو خفیہ رکھے گی اور انہیں ظاہر نہیں کیا جائے گا۔
اطلاع قبول یا مسترد کرنے کے فیصلے کے بعد متعلقہ شخص کو پانچ دن کے اندر آگاہ کیا جائے گا۔
غیر فعال وقف کیا ہے؟
نئے ضابطے میں نامعلوم وقف اور غیر فعال وقف میں فرق بھی رکھا گیا ہے۔
اگر کسی وقف کا ناظر تو موجود ہو، لیکن اس کی آمدنی مسلسل دو سال سے بند ہو یا دو سال سے اس وقف سے کوئی عملی فائدہ حاصل نہ کیا جارہا ہو تو اسے غیر فعال وقف تصور کیا جاسکتا ہے۔
موجودہ ناظرین کو ایک سال کا وقت دیا گیا ہے کہ وہ ایسے وقف کو دوبارہ فعال کریں۔ اتھارٹی ضرورت پڑنے پر مزید ایک سال کی مہلت بھی دے سکتی ہے۔
اہم بات
پرانے قواعد میں انعام کی زیادہ سے زیادہ حد 10 لاکھ ریال تھی، مگر نئے ضابطے کے تحت یہ حد بڑھا کر 10 ملین ریال کردی گئی ہے۔
یعنی قابلِ اعتبار ثبوت کے ساتھ کسی حقیقی نامعلوم وقف کی نشاندہی کرنے والے شخص کو وقف کی مالیت کے 5 فیصد تک، مگر زیادہ سے زیادہ 10 ملین ریال انعام مل سکتا ہے۔