خالد نواز چیمہ
جدہ
کینیڈا سے آنے والے ممتاز شاعر حبیب صدیقی کے اعزاز میں جدہ کی نامور ادبی و ثقافتی تنظیم کبابش آرٹس کونسل کے زیر اہتمام باوقار اور یادگار محفلِ مشاعرہ منعقد ہوئی جس میں شہر کے معروف شعرائے کرام نے اپنے فکر انگیز اور دلنشیں کلام سے سامعین کو مسحور کر دیا۔
مزید پڑھیں
تقریب کی صدارت معروف ادب نواز شخصیت ظفر عالم چیمہ نے کی جبکہ مہمانِ خصوصی حبیب صدیقی تھے۔
مشاعرے کی نظامت کبابش آرٹس کونسل جدہ کے صدر آفتاب ترابی نے خوش اسلوبی سے انجام دی۔
محفل کا آغاز عمر مسعود پوری کی تلاوتِ کلامِ پاک سے ہوا، جبکہ نعتِ رسولِ مقبولﷺ سلیم احمد نے پیش کی۔
ناظمِ مشاعرہ آفتاب ترابی نے پاک و ہند کی مشاعرے کی روایت پر روشنی ڈالتے ہوئے کہا کہ شاعر معاشرے کا آئینہ ہوتے ہیں، جو حالاتِ حاضرہ کو لفظوں میں ڈھال کر عوام کے سامنے پیش کرتے ہیں۔
انہوں نے کہا کہ باکردار شاعر بلا خوف و خطر حقائق بیان کرتا ہے اور اپنی شاعری کے ذریعے معاشرتی اصلاح اور فکری بیداری کا فریضہ انجام دیتا ہے۔
تقریب کے ابتدائیہ میں کبابش آرٹس کونسل کے چیئرمین ملک علی خورشید سلطان نے کہا کہ ادبی سرگرمیاں کسی بھی معاشرے کی فکری تربیت کا بنیادی ستون ہوتی ہیں۔
انہوں نے زور دیا کہ نئی نسل کو اپنی ادبی اور ثقافتی وراثت سے جوڑنا وقت کی اہم ضرورت ہے جبکہ کبابش آرٹس کونسل گزشتہ 3 دہائیوں سے جدہ میں ادب کی ترویج کے لیے مسلسل سرگرمِ عمل ہے۔
ناظمِ مشاعرہ نے کبابش آرٹس کونسل کا تاریخی پس منظر بیان کرتے ہوئے بتایا کہ اس تنظیم کی بنیاد 3 دہائیاں قبل کبابش ریسٹورنٹ کے مالک اور پاکستانی کمیونٹی کے ممتاز رہنما مرحوم ملک خورشید سلطان نے رکھی تھی۔
ان کی وفات کے بعد ان کے فرزند ارجمند ملک علی خورشید سلطان نہایت خلوص اور لگن سے اپنے والد کے مشن کو آگے بڑھا رہے ہیں اور جدہ میں ادبی سرگرمیوں کے فروغ میں نمایاں کردار ادا کر رہے ہیں۔
آخر میں کبابش ریسٹورنٹ کی جانب سے مہمانانِ گرامی کے اعزاز میں پرتکلف عشائیہ پیش کیا گیا، جس سے محفل کی خوشگوار یادوں میں مزید اضافہ ہوا۔