ولی عہد و وزیرِ اعظم شہزادہ محمد بن سلمان بن عبد العزیز آل سعود نے آج منگل کو ریاض کے قصر الیمامہ میں ترکیہ کے صدر رجب طیب اردگان کا استقبال کیا ہے۔
سعودی پریس ایجنسی کے مطابق قصر الیمامہ میں ترک صدر رجب طیب اردگان کے اعزاز میں شاندار استقبالیہ تقریب منعقد کی گئی۔
بعد ازاں ولی عہد شہزادہ محمد بن سلمان اور ترکیہ کے صدر رجب طیب اردگان کے درمیان باضابطہ مذاکراتی اجلاس منعقد ہوا۔
ولی عہد شہزادہ محمد بن سلمان نے ترکیہ کے صدر کو مملکت میں خوش آمدید کہا جبکہ صدر اردگان نے ریاض کے دورے اور ولی عہد سے ملاقات پر مسرت کا اظہار کیا۔
ملاقات کے دوران دونوں برادر ممالک کے درمیان دوطرفہ تعلقات کے امکانات، مختلف شعبوں میں تعاون اور اس کے فروغ کے لیے دستیاب امید افزا مواقع کا جائزہ لیا گیا۔
نیز خطے اور دنیا میں ہونے والی پیش رفت اور ان سے متعلق کی جانے والی کوششوں پر بھی تبادلۂ خیال کیا گیا۔