ماہِ صیام کے ابتدائی دنوں میں لوگ عموماً سردرد کی شکایت کرتے ہیں، آئیے جانتے ہیں کہ اس مسئلے سے کس طرح بچا جا سکتا ہے۔
رمضان المبارک کے آغاز میں بعض افراد کا کہنا ہے کہ انہیں صبح سے ہلکا سردرد شروع ہوتا ہے جو شام تک جاری رہتا ہے۔
معروف ماہرِ صحت اور کینسر پر تحقیق کے استاد ڈاکٹر فہد الخضیری نے اس سلسلے میں وضاحت اور احتیاطی تدابیر پیش کی ہیں۔
سبق ویب سائٹ کی رپورٹ کے مطابق ڈاکٹر فہد الخضیری نے بتایا کہ رمضان المبارک میں ایسی کیفیت عموماً عارضی ہوتی ہے اور جیسے ہی جسم روزہ کی حالت سے ہم آہنگ ہوتا ہے، یہ خودبخود بہتر ہو جاتی ہے۔
سر درد کی بنیادی وجوہات
ڈاکٹر فہد الخضیری کے مطابق رمضان کے پہلے ایک یا دو دن سر درد کی سب سے عام وجہ پانی کی کمی (ڈی ہائیڈریشن) ہوتی ہے۔
یہ کیفیت زیادہ تر تیسرے دن تک ختم ہو جاتی ہے، کیوں کہ اس وقت تک جسم روزہ رکھنے کے معمولات کا عادی ہو جاتا ہے۔
انہوں نے بتایا کہ اس کے علاوہ سر درد کی ایک بڑی وجہ روزمرہ کی عادتیں بھی ہوتی ہیں، خاص طور پر صبح کے وقت کافی پینا یا سگریٹ نوشی۔
جب یہ عادتیں رمضان المبارک میں اچانک ترک کی جاتی ہیں تو جسم ردِعمل کے طور پر سر درد کی صورت میں اثر ظاہر کرتا ہے۔
کافی اور سگریٹ کے عادی افراد کے لیے مشورہ
ڈاکٹر فہد الخضیری نے مشورہ دیا کہ رمضان المبارک سے پہلے ہی ایسی عادتوں میں بتدریج کمی لانا بہتر ہوتا ہے۔
انہوں نے کہا کہ رمضان کی تیاری کے لیے کم از کم 2 ہفتے پہلے کافی پینے کا وقت آہستہ آہستہ تبدیل کرلینا چاہیے۔
انہوں نے کہا کہ پہلے کافی کو صبح کے بجائے دوپہر میں منتقل کیا جائے، پھر چند دن بعد شام کے وقت پینے کی عادت ڈالی جائے۔
اس طرح رمضان میں افطار کے بعد کافی پینے سے جسم کو زیادہ مشکل پیش نہیں آتی اور کیفین کی اچانک کمی سے ہونے والا سر درد کم ہو جاتا ہے۔
افطار کے وقت پانی کی اہمیت
ماہرِ صحت کے مطابق روزہ افطار کرتے وقت کم از کم دو گلاس پانی پینا چاہیے۔ یعنی روزہ پانی سے کھولنا بہتر ہے تاکہ دن بھر میں ہونے والی پانی کی کمی پوری ہو سکے۔
اسی طرح افطار کے فوراً بعد خالی پیٹ تیز ذائقہ یا زیادہ مقدار میں کافی پینے سے بھی پرہیز کیا جائے کیوں کہ یہ معدے اور سر درد دونوں کے لیے نقصان دہ ہو سکتا ہے۔
رمضان سے پہلے جسم کی تیاری
ڈاکٹر فہد الخضیری کے مطابق رمضان سے پہلے رات کے وقت پانی زیادہ پینے کی عادت ڈالنا بھی مفید ثابت ہوتا ہے۔
اس سے جسم دن کے وقت پانی کی کمی کو بہتر طور پر برداشت کر لیتا ہے اور روزے کے دوران سر درد کے امکانات کم ہو جاتے ہیں۔
نتیجے کے طور پر مختصراً یوں سمجھا جا سکتا ہے کہ رمضان کے ابتدائی دنوں میں سر درد ایک عام اور عارضی مسئلہ ہے، جس سے گھبرانے کی ضرورت نہیں۔
مناسب پانی پینا، کافی اور سگریٹ جیسی عادتوں میں بروقت کمی اور جسم کو پہلے سے تیار کرنا روزے کو آسان و صحت مند بنانے میں اہم کردار ادا کرتا ہے۔