اسپین کی فتح اور ارجنٹائن کی شکست کے ساتھ فٹبال ورلڈکپ 2026 تو ختم ہوگیا، تاہم یہ ٹورنامنٹ صرف ایک نئے عالمی چیمپئن کی تاج پوشی کی کہانی نہیں ہے۔
مزید پڑھیں
اس میگا ایونٹ کے فائنل کی آخری سیٹی نے بیک وقت فٹبال کے ایک پورے دور کے خاتمے کا احساس پیدا کیا ہے۔
فیران ٹوریس کی جانب سے اس عالمی کپ کے فیصلہ کُن گول نے اسپین کو دوسری مرتبہ عالمی چیمپئن بنایا، لیکن دنیا بھر کے شائقین کی نگاہیں تب بھی اُن بڑے ناموں پر ہی جمی رہیں جو شاید دوبارہ ورلڈکپ کے میدان میں دکھائی نہ دیں۔
میسی اور رونالڈو کے آخری ادھورے مناظر
لیونل میسی نے 39 برس کی عمر میں ایک بار پھر ثابت کیا ہے کہ بڑے مقابلوں میں اُن کا اثر اب بھی برقرار ہے۔
8 گول اور 4 اسسٹ کے ساتھ انہوں نے ارجنٹائن کو فائنل تک پہنچایا، مگر اسپین کے خلاف شکست نے مسلسل دوسری عالمی فتح کا خواب توڑ دیا۔
میسی نے اپنے مستقبل کے بارے میں کوئی حتمی اعلان نہیں کیا، تاہم 6 ورلڈکپ، 34 میچ، 21 گول اور ریکارڈ 12 اسسٹ کے بعد یہ ماننا مشکل ہے کہ وہ 2030ء میں بھی اسی سطح پر موجود ہوں گے۔
اسی طرح کرسٹیانو رونالڈو کے لیے بھی ورلڈکپ میں منظر مختلف نہیں تھا، جہاں پرتگال پری کوارٹر فائنل میں اسپین سے ہارا تو 41 سالہ رونالڈو آنسوؤں کے ساتھ میدان سے رخصت ہوئے۔
6 مرتبہ فٹبال ورلڈکپ کھیلنے والے کرسٹیانو رونالڈو نے 27 میچوں میں 11 گول کیے، مگر عالمی چیمپئن بننے کی خواہش پوری نہ ہوسکی۔
🌟 اہم نکات
نیمار کا باقاعدہ الوداع
ان دونوں کے برعکس برازیل کے نیمار نے انتظار نہیں کیا۔ ناروے کے ہاتھوں پری کوارٹر فائنل میں شکست کے بعد انہوں نے بین الاقوامی فٹبال سے ریٹائرمنٹ کا اعلان کردیا۔
4 ورلڈکپ کھیلنے والے نیمار نے عالمی مقابلوں میں 9 گول کیے، جبکہ برازیل کے لیے 130 میچوں میں 80 گول کے ساتھ ملک کے سب سے کامیاب اسکورر رہے ہیں۔
اُن کے کیریئر میں کئی یادگار لمحات آئے، لیکن برازیل کو چھٹا عالمی کپ نہ دلانے کی حسرت برقرار رہی۔
نیمار کے ساتھی کاسیمیرو نے بھی عالمی فٹبال کو خیرباد کہہ دیا ہے۔ 3 ورلڈکپ کھیلنے والے مڈفیلڈر کو اس ٹورنامنٹ میں اپنی کارکردگی پر سخت تنقید کا سامنا کرنا پڑا۔
موڈرچ اور نوئر کا تاریخی سفر
کروشیا کے لوکا موڈرچ نے 5 ورلڈکپ میں اپنے ملک کی نمائندگی کی ہے۔ 2018ء میں فائنل اور 2022ء میں تیسری پوزیشن تک کروشیا کا سفر ان کی قیادت اور غیر معمولی کھیل کے بغیر ممکن نہ تھا۔
اسی طرح 40 سالہ موڈرچ کا سفر بھی پرتگال کے خلاف شکست پر ختم ہوا۔ انہوں نے 23 عالمی کپ میچ کھیلے اور ایک چھوٹے ملک کو فٹبال کی بڑی طاقت بنانے میں مرکزی کردار ادا کیا۔
جرمنی کے مانوئل نوئر بھی یادگار ورثہ چھوڑ کر گئے ہیں۔
پیراگوئے کے خلاف شکست کے بعد انہوں نے دوبارہ بین الاقوامی فٹبال چھوڑنے کا فیصلہ کیا۔ 5 ورلڈکپ اور 23 میچ کھیلنے والے نوئر 2014 کی عالمی چیمپئن جرمن ٹیم کے مضبوط ستون تھے۔
گول پوسٹ کے 2 محافظ رخصت
میکسیکو کے گیئرمو اوچوا کا نام ورلڈکپ کی یادگار گول کیپنگ کارکردگیوں کے ساتھ جڑا رہے گا۔ 6 عالمی کپ اسکواڈز کا حصہ بننے والے اوچوا نے انگلینڈ کے خلاف شکست کے بعد فٹبال سے مکمل ریٹائرمنٹ لے لی ہے۔
یوراگوئے کے فرنینڈو موسلیرا بھی گروپ مرحلے میں ٹیم کے اخراج کے بعد رخصت ہوگئے۔ 4 ورلڈکپ کھیلنے والے موسلیرا نے 132 بین الاقوامی میچوں میں یوراگوئے کی نمائندگی کی۔
ایک نسل، کئی نام
ایکواڈور کے ریکارڈ اسکورر اینر ویلنسیا نے بھی ریٹائرمنٹ کا اعلان کردیا، جبکہ سون ہیونگ من، کیون ڈی بروئن، ورجل فان ڈائک اور خامیس روڈریگز کے لیے 2030 تک فٹنس برقرار رکھنا آسان نہیں ہوگا۔
یہ کھلاڑی شاید ابھی باضابطہ الوداع نہ کہیں، مگر عمر اور کیریئر کے مرحلے کو دیکھتے ہوئے 2026 ان کا آخری ورلڈکپ دکھائی دیتا ہے۔
اس ٹورنامنٹ نے اسپین کو نیا تاج دیا، لیکن ساتھ ہی میسی، رونالڈو، نیمار، موڈرچ اور ان کے ہم عصروں کی اس نسل کو رخصت ہوتے بھی دیکھا، جس نے تقریباً 2 دہائیوں تک عالمی فٹبال کی کہانی لکھی ہے۔