فیفا نے ورلڈکپ 2026 کے فائنل میچ کے دوران ایک غیر معمولی تبدیلی کا فیصلہ کیا ہے جس کے تحت دونوں ہاف کے درمیان وقفے کا دورانیہ 15 منٹ سے بڑھا کر 25 سے 30 منٹ تک کر دیا جائے گا تاکہ ایک بڑا شو پیش کیا جا سکے۔
مزید پڑھیں
برطانوی اخبار دی ٹائمز کے مطابق اس شاندار میوزیکل شو میں جسٹن بیبر، شکیرا، میڈونا، بی ٹی ایس، برنا بوائے اور کولڈ پلے جیسے عالمی شہرت یافتہ فنکار شرکت کریں گے۔
یہ پرفارمنس میچ سے قبل اور ہاف ٹائم کے دوران پیش کی جائے گی جس سے ایونٹ کو مزید یادگار بنایا جائے گا۔
اگرچہ فٹبال کے موجودہ قوانین کے مطابق ہاف ٹائم وقفہ 15 منٹ سے
زیادہ نہیں ہو سکتا، تاہم فیفا نے اس فیصلے کو حتمی شکل دے دی ہے۔
فائنل میچ کے ریفری کو خصوصی ہدایت دی گئی ہے کہ وہ اس توسیعی وقفے کی باضابطہ منظوری دیں تاکہ انتظامی امور بلا تعطل چل سکیں۔
فیفا اس سے قبل کلب ورلڈکپ کے فائنل میں بھی یہ تجربہ کرچکا ہے جہاں وقفے کو 24 منٹ تک بڑھایا گیا تھا۔
اس اقدام پر اُس وقت چیلسی اور پیرس سینٹ جرمین کی ٹیموں کی جانب سے تنقید کی گئی تھی کیونکہ اس سے کھلاڑیوں کے کھیل کا تسلسل متاثر ہوتا ہے۔
ورلڈ کپ کے آپریشنز ڈائریکٹر ہیمو شِرگی نے تصدیق کی ہے کہ اختتامی تقریب موسیقی، ثقافت اور فٹبال کا حسین امتزاج ہوگی۔
انہوں نے بتایا کہ یہ تقریب ٹورنامنٹ کے فاتح کی تاج پوشی سے قبل شائقین کے لیے ایک پرجوش ماحول فراہم کرے گی اور ایونٹ کی رونقوں کو چار چاند لگا دے گی۔
تجزیہ کاروں کے مطابق وقفے میں اس طویل اضافے سے میچ کے مجموعی ردھم پر اثر پڑ سکتا ہے، خاص طور پر ان ٹیموں کے لیے جو ہائی پیس اور بال پوزیشن پر انحصار کرتی ہیں۔
تاہم ایک فائدہ بھی ہے کہ یہ کھلاڑیوں کو اپنی توانائی بحال کرنے کے لیے اضافی وقت بھی فراہم کرے گا۔
فیفا کی جانب سے اس تاریخی تبدیلی کے حوالے سے مزید تفصیلات آئندہ چند دنوں میں جاری کی جائیں گی۔
شائقین فٹبال اب اس فیصلے کو ایک نئے تجربے کے طور پر دیکھ رہے ہیں اور دوسری جانب ٹیموں کی جانب سے اس طویل وقفے کے اثرات پر بحث کا سلسلہ بھی شروع ہو چکا ہے۔