ترکیہ کے شہر استنبول میں میونسپلٹی کی جانب سے تدفین کے لیے مختص زمین کی نئی قیمتوں کے اعلان کے بعد عوامی حلقوں میں شدید بحث چھڑ گئی ہے۔
مزید پڑھیں
نئی فہرست کے مطابق شہر کے مختلف علاقوں میں قبروں کی قیمتوں میں نمایاں اضافہ دیکھنے میں آیا ہے۔
میونسپلٹی کے مطابق استنبول میں تدفین کے لیے سب سے سستی قبر 10 ہزار 728 ترک لیرا یعنی تقریباً 270 امریکی ڈالر کی ہے۔
اسی طرح سب سے مہنگی قبر کی قیمت 3 لاکھ 34 ہزار 896 لیرا یعنی 8 ہزار 400 ڈالر تک پہنچ گئی ہے۔
واضح رہے کہ استنبول میں سیکڑوں قبرستان موجود ہیں جن کا انتظام شہر کی میونسپلٹی سنبھالتی ہے۔
قبروں کی قیمتوں کا تعین ان کے جغرافیائی محل وقوع، قبرستان کی تاریخی اہمیت اور وہاں دستیاب جگہ کی دستیابی کی بنیاد پر کیا جاتا ہے، جس کی وجہ سے مرکزی علاقوں میں قیمتیں کافی زیادہ ہیں۔
عام طور پر ترک میونسپلٹیز شہریوں کو تدفین کی بنیادی سہولیات فراہم کرتی ہیں، تاہم پہلے سے قبر خریدنے یا کسی مخصوص اور مہنگے قبرستان میں تدفین کا انتخاب کرنے پر اضافی فیس ادا کرنا پڑتی ہے۔
یہ فیس متعلقہ میونسپلٹی کے ضوابط اور گنجائش کے مطابق طے کی جاتی ہے۔
واضح رہے کہ استنبول کی آبادی ایک کروڑ 60 لاکھ سے زائد ہے، جس کے باعث یہاں تدفین کے لیے زمین کی طلب میں مسلسل اضافہ ہو رہا ہے۔
شہر کے کچھ قبرستانوں میں جگہ کی شدید قلت ہے، جس کی وجہ سے مقبول اور مرکزی علاقوں میں قبروں کی قیمتیں دیگر مقامات کے مقابلے میں بہت زیادہ ہیں۔
ترکیہ میں حالیہ برسوں کے دوران مہنگائی کی بلند شرح اور کرنسی کی قدر میں اتار چڑھاؤ کے باعث زندگی کے اخراجات میں اضافہ ہوا ہے۔
اسی معاشی صورتحال نے میونسپل خدمات کی قیمتوں کو بھی متاثر کیا ہے، جس کے نتیجے میں تدفین کے اخراجات میں بھی نمایاں اضافہ دیکھنے میں آیا ہے۔
نئی قیمتوں کے اعلان کے بعد سوشل میڈیا پر شہریوں کی جانب سے شدید ردعمل سامنے آیا ہے۔
کئی افراد نے بڑھتی ہوئی قیمتوں پر حیرانی کا اظہار کیا ہے اور طنزیہ انداز میں کہا ہے کہ اب مرنے کے لیے بھی ایک بھاری بجٹ کی ضرورت پڑتی ہے۔
میونسپل حکام کا کہنا ہے کہ عوامی خدمات کی فیسوں کا وقتاً فوقتاً جائزہ لیا جاتا ہے تاکہ بڑھتی ہوئی مہنگائی اور دیکھ بھال کے اخراجات کو پورا کیا جا سکے۔
یہ نئی قیمتیں اسی پالیسی کا حصہ ہیں جس کا مقصد میونسپل خدمات کے معیار کو برقرار رکھنا ہے۔