کھیلوں کا سامان تیار کرنے والی معروف کمپنی ’ایڈیڈاس‘ نے فیفا ورلڈکپ 2026 کے آخری 4 اہم میچوں کے لیے ایک خصوصی فٹبال ’ ٹرائیونڈا فائنل ‘ متعارف کروا دی ہے۔
مزید پڑھیں
یہ فٹبال ٹورنامنٹ کے (صرف 4 میچز) سیمی فائنلز، تیسری پوزیشن کے میچ اور فائنل میں استعمال ہوگی۔
فائنل مرحلے کی خصوصی یادگار
ورلڈکپ آغاز سے کوارٹر فائنل تک رنگ برنگی ’ٹرائیونڈا‘فٹ بال استعمال کی گئی تھی اور اب فائنل مقابلوں کے لیے سفید، سیاہ اور سنہری رنگوں پر مشتمل ایک نیا اور دیدہ زیب ڈیزائن متعارف کرایا گیا ہے۔
تاریخ میں پہلی بار ایسا ہو رہا ہے کہ فیفا نے ٹورنامنٹ کے اختتامی مراحل کے لیے الگ فٹبال مختص کی ہے۔
منفرد ڈیزائن اور میزبانی کا خراجِ تحسین
اس نئی فٹبال پر ان 4 شہروں کے علامتی ڈیزائن موجود ہیں، جہاں فائنل مقابلے کھیلے جا رہے ہیں۔
ان شہروں میں اٹلانٹا، میامی، ڈالاس اور نیویارک شامل ہیں۔ اس کے علاوہ امریکا، میکسیکو اور کینیڈا کے تمام میزبان شہروں کے نام بھی فٹ بال کی سطح پر نمایاں کیے گئے ہیں۔
ایڈیڈاس کا وژن اور جدید آرٹ
ایڈیڈاس کے مطابق ’ٹریونڈا فائنل‘ کا ڈیزائن فٹ بال کی سب سے بڑی ٹرافی حاصل کرنے کے سفر سے متاثر ہے۔
اس میں موجود سنہری رنگ کامیابی کو ظاہر کرتا ہے، جبکہ گلابی اور سرخ رنگ کے امتزاج سے کھلاڑیوں کے جوتوں اور کھیل کی توانائی کو جوڑا گیا ہے۔
اسمارٹ ٹیکنالوجی اور درست فیصلوں کی ضمانت
ظاہری تبدیلی کے باوجود اس منفرد فٹبال کی ایروڈائنامک خصوصیات وہی رکھی گئی ہیں۔
اِس کے اندر موجود سینسرز 500 مرتبہ فی سیکنڈ کی رفتار سے ڈیٹا اکٹھا کرتے ہیں۔ یہ جدید ٹیکنالوجی ’وی اے آر‘ (VAR) کی مدد سے ریفریز کو درست اور فوری فیصلے کرنے میں مدد فراہم کرتی ہے۔
ڈیٹا اور شائقین کی دلچسپی
اس اسمارٹ فٹبال کی مدد سے شائقین اب کھیل کے دوران ایڈوانس اعداد و شمار بھی دیکھ سکیں گے۔ مثلاً گول کی رفتار یا کک کی قوت۔
یہ ٹیکنالوجی پہلے بھی کارآمد ثابت ہو چکی ہے، جیسے انگلینڈ اور ناروے کے کوارٹر فائنل میچ میں فٹبال کے اندر موجود سینسر نے گول کی تصدیق کی تھی۔
ماہرین کا کہنا ہے کہ ’ ٹرائیونڈا فائنل ‘ کا تعارف صرف ایک نئی فٹ بال کا اعلان نہیں، بلکہ یہ جدید ٹیکنالوجی اور روایتی کھیل کا حسین امتزاج ہے۔
یہ جدید فیچرز نہ صرف کھیل کی شفافیت کو یقینی بناتے ہیں، بلکہ فٹبال ورلڈکپ کے آخری لمحات کو شائقین کے لیے مزید سنسنی خیز اور یادگار بنا دیتے ہیں۔