عالمی فٹبال کے افق پر تیزی سے ابھرنے والے اسپین کے نوجوان اسٹار لامین یامال آج کروڑوں شائقین کے دلوں کی دھڑکن بن چکے ہیں۔
مزید پڑھیں
لیکن کیا آپ جانتے ہیں کہ ان کا یہ منفرد نام ’لامین یامال‘ کسی خاندانی روایت کا نتیجہ نہیں، بلکہ ایک ایسی جذباتی کہانی کا تسلسل ہے جس کا تعلق ان کی زندگی کے انتہائی کٹھن ابتدائی دنوں سے ہے۔
نام کے پیچھے چھپی جذباتی داستان
اسپین کی نمائندگی کرنے والے بارسلونا کے اس اسٹار کھلاڑی لامین یامال نے حال ہی میں اپنی 19ویں سالگرہ منائی ہے۔
لامین یامال کا نام ان کے والدین منیر نصراوی اور شیلا ایبانا نے اپنے ان دو محسنوں کے نام پر رکھا، جنہوں نے اُس وقت اِن کی مدد کی تھی جب وہ مالی مشکلات سے دوچار تھے۔
محسنین اور نام کی پہچان
رپورٹس کے مطابق جب شیلا ایبانا کی عمر صرف 16 برس تھی اور وہ اپنے پہلے بچے کی ولادت کے بعد شدید معاشی بحران میں مبتلا تھے، تب لامین اور یامال نامی 2 افراد نے انہیں رہائش فراہم کرنے میں مدد کی تھی۔
بعد میں والدین نے انہی محسنوں کے ناموں کو اپنے بیٹے کا نام ’لامین یامال‘ بنا کر اُن کا شکریہ ادا کیا۔
لامین یامال: غربت سے شہرت تک کا سفر
لامین یامال کا تعلق بارسلونا کے قریبی ساحلی شہر ماتارو سے ہے اور صرف 12 سال کی عمر میں وہ مشہور فٹبال اکیڈمی لا ماسیا کا حصہ بن گئے تھے۔
آج لامین یامال بارسلونا کے ساتھ 40 ملین یورو سالانہ کے معاہدے کے علاوہ ایڈیڈاس اور کوکا کولا جیسے عالمی برانڈز کے سفیر بھی ہیں۔
👶⚽️ La historia de Lamine Yamal Nasraoui Ebana
— Carrusel Deportivo (@carrusel) September 17, 2024
🏡 Cuando sus padres eran jóvenes, vivieron en casa de dos personas que se llamaban Lamine y Yamal
👀👉 "No pudieron pagarles el alquiler y les prometió que si un día tenían un hijo les pondría sus nombres"#elBar95☕️🔥 pic.twitter.com/Wq3EuoBA1G
ماضی کو نہ بھولنے والا ستارہ
شہرت اور دولت کے باوجود لامین یامال آج بھی اپنے ماضی کو نہیں بھولے۔
وہ اپنے گول کا جشن مناتے وقت 304 کا اشارہ کرتے ہیں، جو ان کے آبائی علاقے روکافونڈا کا پوسٹل کوڈ ہے۔ یہ ان کا اپنے پس منظر اور اس علاقے کے ساتھ گہرا جذباتی لگاؤ ظاہر کرتا ہے۔
معمہ، جو آج تک نہیں سلجھا
اس کہانی میں دلچسپ بات یہ ہے کہ وہ 2 افراد، لامین اور یامال، جنہوں نے والدین کی مشکل وقت میں مدد کرکے اِس ستارے کے نام کی بنیاد رکھی، آج بھی گمنام ہیں۔
نہ لامین یامال نے اُن کی شناخت ظاہر کی اور نہ ہی ان محسنوں نے خود کو کبھی منظرِعام پر لانے کی کوشش کی ہے۔
لامین یامال کی یہ جذباتی کہانی محض ایک فٹبالر کی کامیابی کی داستان نہیں، بلکہ یہ انسانی ہمدردی اور شکر گزاری کی ایک بہترین مثال بھی ہے۔
آج جب یہ نوجوان دنیا کے سب سے بڑے اسٹیڈیمز میں اپنی صلاحیتوں کا لوہا منوا رہا ہے، اس کا نام ان 2 نامعلوم افراد کی شرافت اور بروقت مدد کی ایک مستقل یادگار بن چکا ہے، جو ممکنہ طور پر آج اس کی کامیابی پر فخر محسوس کرتے ہوں گے۔