فٹبال ورلڈکپ 2026 کے سیمی فائنل میں ارجنٹائن اور انگلینڈ کا ٹکراؤ ہونے جا رہا ہے، جس پر نہ صرف دونوں ممالک بلکہ ہزاروں کلومیٹر دُور واقع بنگلہ دیش میں بھی گہرا جوش و خروش پایا جاتا ہے۔
مزید پڑھیں
ہسپانوی اخبار مارکا کے مطابق یہ ایک ایسی جذباتی وابستگی ہے جو کسی بھی منطق سے بالاتر ہے۔
بنگلہ دیش میں ارجنٹائن کی ٹیم کے لیے دیوانگی اس قدر ہے کہ میچ کے دوران وہاں زندگی کی معمول کی سرگرمیاں تھم جاتی ہیں۔
ایسا محسوس ہوتا ہے جیسے ارجنٹائن کا کوئی مقامی میچ ہو رہا ہو، جہاں سڑکیں نیلی اور سفید رنگ کی جھنڈیوں سے سجائی جاتی ہیں۔
بنگلہ دیش میں ارجنٹائن کی جرسیوں کی مانگ دنیا میں سب سے زیادہ ہے، جو ارجنٹائن کے باہر اس ٹیم کی مقبولیت کا منہ بولتا ثبوت ہے۔
وہاں کے عوام ارجنٹائن کی ٹیم کو اپنی قومی ٹیم کی طرح سپورٹ کرتے ہیں اور ہر جیت پر ایسے جشن مناتے ہیں جیسے وہ خود فاتح ہوں۔
تجزیہ کاروں کے مطابق بنگلہ دیش کے اس جذباتی لگاؤ کی جڑیں تاریخ میں پیوست ہیں۔ برطانوی دور کی تلخ یادوں اور میراڈونا کے سحر نے بنگلہ دیشی عوام کو ارجنٹائن کی حمایت پر مجبور کر دیا ہے۔
ٹیلی ویژن کی آمد نے اس جذبے کو مزید ہوا دی ہے، جہاں بنگلہ دیشی عوام فٹبال کے ذریعے اپنی خوشیاں تلاش کرتے ہیں اور ارجنٹائن کی ٹیم ان کے لیے ایک خوشی علامت بن چکی ہے۔
ارجنٹائن فٹبال ایسوسی ایشن نے بھی قطر ورلڈ کپ 2022 کے دوران اس حمایت کا شکریہ ادا کیا تھا۔
مقامی فلم میکر مجیب کا کہنا ہے کہ انہوں نے بچپن سے پیسے بچا کر لیونل میسی کی جرسی خریدی تھی۔ انہوں نے بتایا کہ جب ارجنٹائن جیتتا ہے تو انہیں محسوس ہوتا ہے جیسے انہوں نے خود کوئی بڑی کامیابی حاصل کر لی ہو، یہ جذبہ واقعی ناقابل یقین ہے۔
دنیا کی آٹھویں بڑی آبادی والے ملک بنگلہ دیش میں میسی اور ان کی ٹیم کی مقبولیت کا اندازہ اس بات سے لگایا جا سکتا ہے کہ اب ارجنٹائن کو اپنے 46 ملین مقامی شہریوں کے علاوہ 117 ملین (تقریباً 12 کروڑ) بنگلہ دیشی شائقین کی بھرپور حمایت بھی حاصل ہے۔
بنگلہ دیش کے شائقین کا رجحان دیکھنے سے اندازہ ہوتا ہے کہ انگلینڈ کی ٹیم کو سیمی فائنل میں صرف میدان میں موجود 11 کھلاڑیوں کا سامنا نہیں ہوگا، بلکہ اسے تقریباً 200 ملین شائقین کے دباؤ کا بھی سامنا کرنا پڑے گا۔
اس بڑے مقابلے کے فٹبال کی تاریخ کے ایک منفرد اور یادگار میچ ثابت ہونے کی توقع ہے۔