فیفا نے 2026 فٹبال ورلڈ کپ کے سیمی فائنل میں فرانس اور اسپین کے درمیان ہونے والے اہم مقابلے کے لیے سلواڈور کے ایوان بارٹون کو ریفری مقرر کیا ہے۔
مزید پڑھیں
ایوان بارٹون اس اہم میچ کے دوران اپنے ماضی کے سخت فیصلوں اور کھیل پر مکمل کنٹرول رکھنے کی شہرت کے ساتھ میدان میں اتریں گے۔
ورلڈکپ میں ریکارڈ ساز ریفری
امریکی ریاست ٹیکساس کے آرلنگٹن اسٹیڈیم میں کھیلا جانے والا بارٹون کے کیریئر کا چوتھا ورلڈکپ میچ ہوگا۔
اس کے ساتھ ہی وہ وسطی امریکہ سے تعلق رکھنے والے ورلڈکپ تاریخ
کے سب سے زیادہ میچز سپروائز کرنے والے ریفری بن گئے ہیں۔
میدان میں سخت گیر رویہ
ایوان بارٹون اپنی پیشہ ورانہ زندگی میں 300 سے زائد میچز میں ریفری کے فرائض انجام دے چکے ہیں۔
ہسپانوی اخبار ’مارکا‘ کے مطابق انہوں نے اپنے کیریئر میں 1400 سے زائد یلو کارڈز دکھائے ہیں، جبکہ 86 کھلاڑیوں کو براہِ راست ریڈ کارڈ دکھا کر میدان سے باہر بھیجا ہے۔
تاریخی ریڈ کارڈ کا واقعہ
بارٹون دنیا کے پہلے ریفری ہیں، جنہوں نے ایک کھلاڑی کو صرف منہ ڈھانپ کر مخالف ٹیم سے بات کرنے پر ریڈ کارڈ دکھایا تھا۔
یہ واقعہ ترکی اور پیراگوئے کے میچ کے دوران پیش آیاتھا، جہاں انہوں نے قطری ریفری خمیس المری کی مدد سے یہ سخت فیصلہ لیا۔
تعلیمی پس منظر اور کیریئر
1991ء میں سلواڈور کے شہر سانتا آنا میں پیدا ہونے والے ایوان بارٹون کا پس منظر فٹبال نہیں، تعلیمی ہے۔
وہ کیمسٹری کے پروفیسر ہیں اور مقامی یونیورسٹی میں پڑھاتے ہیں۔ انہوں نے 2018ء میں فیفا کی انٹرنیشنل ریفری کی پوزیشن حاصل کی تھی۔
عرب لیگز میں تجربہ
بارٹون کو مشرقِ وسطیٰ کے فٹبال حلقوں میں بھی کافی مقبولیت حاصل ہے۔
انہوں نے 3 سیزن کے دوران سعودی عرب کے ’دوری روشن‘ میں 7 میچز سپروائز کیے، جس میں الہلال اور الاتحاد کا مشہور ’کلاسیکو‘ بھی شامل ہے۔
اس کے علاوہ انہوں نے متحدہ عرب امارات کی لیگ میں بھی خدمات دیں۔
متنازع پہلو اور پابندی
ان کا کیریئر ہمیشہ تنازعات سے پاک نہیں رہا۔ رواں برس فروری میں بھی سلواڈور کی مقامی فٹبال فیڈریشن نے ان پر 2 میچوں کی پابندی عائد کی تھی۔
ان پر یہ کارروائی مقامی لیگ کے دوران کچھ فیصلوں پر ہونے والی شدید تنقید اور تنازعات کے بعد کی گئی تھی۔
میسی کو کارڈ دکھانے والے پہلے ریفری
اگست 2023 میں انٹرمیامی اور اورلینڈوسٹی کے میچ میں ایوان بارٹون نے لیونیل میسی کو یلو کارڈ دکھایا تھا۔
یہ میسی کے امریکہ آمد کے بعد پہلا یلو کارڈ تھا، جس پر مخالف ٹیم کے کوچ نے انہیں مزید سخت کارروائی نہ کرنے پر تنقید کا نشانہ بنایا تھا۔
ایوان بارٹون کا شمار ان ریفریز میں ہوتا ہے جو کسی بھی کھلاڑی کی شہرت سے مرعوب ہوئے بغیر قانون کے مطابق فیصلہ کرنے پر یقین رکھتے ہیں۔
فرانس اور اسپین جیسے انتہائی اہم سیمی فائنل میں ان کی موجودگی اس بات کی ضمانت ہے کہ کھیل کے دوران نظم و ضبط برقرار رہے گا۔