جنوبی افریقہ کے فٹبال حلقوں میں اِس وقت سوگ کی فضا چھائی ہوئی ہے، کیونکہ قومی ٹیم اور مامیلوڈی سن ڈاؤنز کے مڈفیلڈر جیڈن ایڈمز 25 برس کی عمر میں وفات پا گئے۔
مزید پڑھیں
ان کی موت کی تصدیق جنوبی افریقی پلیئرز ایسوسی ایشن نے سوشل میڈیا پلیٹ فارم ایکس پر کی ہے۔
ایسوسی ایشن نے اپنے پیغام میں جیڈن ایڈمز کی کم عمری میں وفات پر گہرے دکھ اور افسوس کا اظہار کیا ہے۔
تاہم مامیلوڈی سن ڈاؤنز کلب کی جانب سے تاحال باضابطہ بیان جاری نہیں ہوا اور نہ ہی ان کی موت کی کوئی مخصوص وجہ بتائی گئی ہے۔
جیڈن ایڈمز نے حال ہی میں منعقدہ ورلڈکپ 2026 میں جنوبی افریقہ کی نمائندگی کی تھی۔
سابق کپتان ڈاکٹر خومالو کے مطابق ایڈمز کو ورلڈکپ کے دوران ہی اپنی دادی کے انتقال کی خبر ملی تھی، جس کے باوجود وہ ٹیم کے ساتھ اپنی ذمہ داریاں نبھاتے رہے۔
واضح رہے کہ ورلڈکپ میں جنوبی افریقہ کی ٹیم راؤنڈ آف 32 تک پہنچنے میں کامیاب رہی تھی، جہاں اسے کینیڈا کے ہاتھوں ایک صفر سے شکست کا سامنا کرنا پڑا۔
ایڈمز گروپ مرحلے کے تینوں میچز میں شامل اور کینیڈا کے خلاف ناک آؤٹ میچ میں وہ بینچ پر موجود تھے۔
ٹورنامنٹ کے بعد ایڈمز سمیت مامیلوڈی سن ڈاؤنز کے 7 کھلاڑیوں کو 2 ہفتوں کی اضافی چھٹیاں دی گئی تھیں۔
وہ اگلے ہفتے آسٹریا میں جاری کوچ میگوئل کارڈوسو کی ٹیم کے تربیتی کیمپ میں دوبارہ شامل ہونے والے تھے، لیکن اس سے قبل ہی یہ افسوسناک واقعہ پیش آ گیا۔