جب موسم گرما میں درجہ حرارت بڑھتا ہے تو ہماری توجہ جلد کو دھوپ کی تپش اور وقت سے پہلے بڑھاپے سے بچانے پر مرکوز ہو جاتی ہے۔
مزید پڑھیں
تاہم اکثر لوگ اس حقیقت کو نظر انداز کر دیتے ہیں کہ شدید الٹرا وائلٹ شعاعیں انسانی بالوں اور کھوپڑی کو بھی شدید نقصان پہنچا سکتی ہیں۔
دھوپ کے بالوں پر اثرات
بال بنیادی طور پر کیراٹین پروٹین سے بنتے ہیں جو انہیں مضبوطی اور لچک فراہم کرتا ہے۔
کمزور پڑ جاتے ہیں۔ الٹرا وائلٹ شعاعیں بالوں کی بیرونی تہہ کو متاثر کرتی ہیں، جس سے بال خشک، بے جان اور ٹوٹ پھوٹ کا شکار ہو جاتے ہیں۔
رنگے ہوئے بالوں کے لیے خطرات
اگر آپ کے بال کیمیکل سے رنگے ہوئے ہیں تو دھوپ کا خطرہ دگنا ہو جاتا ہے۔
کیمیائی رنگ بالوں کی قدرتی بیرونی تہہ کو نازک بنا دیتے ہیں، جس سے شعاعیں تیزی سے اندر تک پہنچتی ہیں۔ یہی وجہ ہے کہ چھٹیوں کے دوران بالوں کا رنگ جلد مدہم اور بے رونق ہو جاتا ہے۔
کھوپڑی کی حفاظت کیوں؟
اکثر لوگ بالوں پر توجہ دیتے ہیں لیکن کھوپڑی کی جلد کو بھول جاتے ہیں۔
کھوپڑی کی جلد بھی چہرے کی جلد کی طرح حساس ہوتی ہے اور اسے دھوپ سے جلن یا سوزش ہو سکتی ہے۔ خاص طور پر جن افراد کے بال کم ہوں، انہیں سن برن کا زیادہ خطرہ لاحق رہتا ہے۔
ہیئر پروٹیکشن کی افادیت
موجودہ دور میں ایسے ہیئر سپرے، کریمز اور آئل دستیاب ہیں جو یو وی فلٹرز کے ساتھ آتے ہیں۔
اگرچہ یہ جلد کی سن اسکرین جیسے نہیں ہوتے، تاہم یہ بالوں پر ایک حفاظتی تہہ بناتے ہیں۔ یہ مصنوعات بالوں کو نمی فراہم کرنے کے ساتھ ساتھ دھوپ اور گرمی کے منفی اثرات کو بھی کم کرتی ہیں۔
موسم گرما میں احتیاطی تدابیر
پروڈکٹس کے علاوہ چوڑی ٹوپی پہننا براہِ راست دھوپ سے بچنے کا بہترین ذریعہ ہے۔
دوپہر کے اوقات میں جب شعاعیں سب سے زیادہ تیز ہوتی ہیں، دھوپ میں نکلنے سے گریز کریں۔ یہ سادہ اقدامات بالوں اور کھوپڑی کی صحت کو برقرار رکھنے میں انتہائی معاون ثابت ہو سکتے ہیں۔
نمک اور کلورین کا اثر
گرمیوں میں صرف سورج ہی نہیں بلکہ سمندر کا نمکین پانی اور سوئمنگ پول کا کلورین بھی بالوں کو خشک کر دیتے ہیں۔
ماہرین کا مشورہ ہے کہ تیراکی کے فوراً بعد بالوں کو تازہ پانی سے اچھی طرح دھو لیں تاکہ کیمیکل اور نمک کے اثرات کو زائل کیا جا سکے۔
بہترین دیکھ بھال
بالوں کے لیے ایسی مصنوعات دیکھیں، جن میں پینتھینول، گلیسرین، وٹامن ای اور ہلکے نباتیاتی تیل شامل ہوں۔
یہ اجزا نہ صرف بالوں کو دھوپ سے تحفظ دیتے ہیں بلکہ نمی کو بحال کر کے بالوں کی کھوئی ہوئی چمک اور نرمی کو واپس لانے میں بھی مددگار ثابت ہوتے ہیں۔
موسم گرما میں بالوں کی صحت کا دارومدار صرف شیمپو کے انتخاب پر نہیں بلکہ دھوپ سے بچاؤ پر بھی ہے۔
اپنے بالوں کو یو وی شعاعوں، نمک اور کلورین سے محفوظ رکھ کر آپ نہ صرف ان کی خوبصورتی قائم رکھ سکتے ہیں بلکہ انہیں وقت سے پہلے خراب ہونے سے بھی بچا سکتے ہیں۔