وزیرِ خزانہ اور قومی مرکز برائے نجکاری کے چیئرمین محمد بن عبدالله الجدعان نے بتایا ہے کہ اقتصادی امور کونسلنے نجکاری پروگرام پر غور کرنے کے بعد منظوری دے دی ہے۔
وزیر خزانہ نے وضاحت کی ہے کہ نجکاری پروگرام نے اب تک متعدد اہم کامیابیاں حاصل کی ہیں، جن میں سب سے نمایاں قومی مرکز برائے نجکاری کا قیام ہے، جس نے 200 سے زائد منظوری شدہ منصوبے شروع کیے، جن کی مجموعی سرمایہ کاری 800 ارب ریال بنتی ہے۔
اس کے علاوہ تقریباً 90 معاہدے بھی طے پائے، جن میں ملکیت کی منتقلی کے معاہدے اور سرکاری و نجی شعبے کی شراکت داری کے معاہدے شامل ہیں۔
مزید پڑھیں
سبق ویب سائٹ کے مطابق نجکاری حکمت عملی کے تحت 18 شعبوں میں شہریوں، مقیموں اور زائرین کو فراہم کی جانے والی خدمات کی بہتری، لاکھوں معیاری ملازمتیں اور 2030 تک 220 سے زائد نجی و سرکاری شراکت داری کے معاہدے متوقع ہیں۔
نجی شعبے کی سرمایہ کاری کی کل قدر 2030 تک 240 ارب ریال سے زائد ہونے کا ہدف ہے۔
قومی حکمت عملی برائے نجکاری کے پانچ اہم پروگرام اور 42 عملی اقدامات مقرر کیے گئے ہیں تاکہ وژن 2030 کے اہداف کے مطابق نجکاری کے نظام کو مضبوط اور مؤثر بنایا جا سکے۔
اس حکمت عملی میں ایک عملی پروگرام بھی شامل ہے جو نجکاری کے ترجیحی مواقع کی شناخت اور ترتیب کے لیے ہے، جس میں 145 سے زائد ترجیحی مواقع نجی شعبے کے لیے سرمایہ کاری کے پرکشش مواقع کے طور پر مقرر کیے گئے ہیں۔
وزیر خزانہ نے کہا کہ پروگرام نے نجی شعبے کے کردار کو مضبوط بنایا، سرکاری اثاثوں کے آپریشن کی کارکردگی بڑھائی اور سرمایہ کاری کے لیے قانونی و ضابطہ جاتی ماحول کو بہتر بنایا، جس سے ملکی اقتصادی تنوع اور مسابقتی صلاحیت میں اضافہ ہوا۔
جدعان نے اعلان کیا کہ قومی حکمت عملی برائے نجکاری کے نفاذ کا آغاز کر دیا گیا ہے، جس کی منظوری وزیراعظم کی کابینہ نے 25 نومبر 2025ء کو دی تھی۔
اس حکمت عملی کا مقصد انفراسٹرکچر کی معیار اور کارکردگی میں اضافہ اور عوامی خدمات کی بہتری ہے تاکہ شہریوں، مقیموں اور زائرین کے لیے بہتر سہولیات فراہم کی جا سکیں۔