مراکش کے ہیڈ کوچ محمد وہبی نے راؤنڈ آف 32 میں کسی بھی حریف سے نہ گھبرانے کا اعلان کرتے ہوئے کہا ہے کہ ان کی ٹیم ہر مقابلے کے لیے تیار ہے۔
انہوں نے زور دیا کہ مراکش صرف ناک آؤٹ مرحلے تک پہنچنے نہیں بلکہ ورلڈ کپ جیتنے کے ارادے سے آیا ہے۔
مراکش کے قومی فٹبال ٹیم کے ہیڈ کوچ محمد وہبی نے واضح کیا ہے کہ انہیں فیفا ورلڈ کپ 2026 کے راؤنڈ آف 32 میں کسی مخصوص حریف کا انتظار نہیں، کیونکہ ان کی ٹیم ہر ممکن مقابلے کے لیے تیار ہے۔
ان کا کہنا تھا کہ مراکش اب ایک نئے دور میں داخل ہو چکا ہے، جہاں کھلاڑی خود پر اعتماد رکھتے ہیں اور دنیا کی بڑی ٹیمیں بھی ان کا احترام کرتی ہیں۔
مراکش نے گروپ مرحلے کے آخری میچ میں ہیٹی کے خلاف 1-2 کے خسارے سے شاندار واپسی کرتے ہوئے 4-2 سے کامیابی حاصل کی اور ناک آؤٹ مرحلے میں جگہ بنائی۔
مزید پڑھیں
میچ کے بعد پریس کانفرنس سے خطاب کرتے ہوئے محمد وہبی نے کہا کہ جمعہ کو معلوم ہوگا کہ اگلا حریف کون ہوگا، جبکہ 3 مختلف امکانات موجود ہیں اور ہر ٹیم کا اپنا الگ اندازِ کھیل ہے۔
انہوں نے کہا کہ مراکش ہر صورتحال کے لیے تیار ہے اور کوچنگ اسٹاف پہلے ہی ممکنہ حریفوں، جن میں نیدرلینڈز، جاپان اور سویڈن شامل ہیں، کا تجزیہ کر چکا ہے۔
انہوں نے کہا کہ مراکش بڑے عزائم کے ساتھ ورلڈ کپ میں آیا ہے اور ٹیم کے پاس باصلاحیت کھلاڑی، مضبوط کوچنگ اسٹاف اور شاندار مداح موجود ہیں، جو انہیں ہر مقابلے میں اعتماد فراہم کرتے ہیں۔
محمد وہبی نے کہا کہ مراکش کو اپنے معیار پر یقین رکھنا چاہیے اور اسی لیے ٹیم کا اصل ہدف صرف اگلے مرحلے تک پہنچنا نہیں بلکہ ورلڈ کپ جیتنا ہے۔
تاہم انہوں نے زور دیا کہ اس خواب کی تعبیر کے لیے ہر حریف کا مکمل احترام ضروری ہے۔
انہوں نے مزید کہا کہ ہر میچ کے بعد ٹیم اپنی خامیوں کا باریک بینی سے جائزہ لیتی ہے تاکہ آئندہ مقابلوں میں مزید بہتر کارکردگی دکھائی جا سکے۔
میکسیکو کے شہر مونٹیری میں اگلا میچ کھیلنے کے حوالے سے وہبی نے جذباتی انداز میں کہا کہ انہیں 1986 کا ورلڈ کپ یاد ہے، جب مراکش نے اسی سرزمین پر تاریخ رقم کرتے ہوئے پہلی بار ناک آؤٹ مرحلے میں جگہ بنائی تھی۔
ان کے بقول ’ہم اسی مقام پر واپس جا رہے ہیں جہاں سے ہماری سنہری داستان کا آغاز ہوا تھا‘۔
| # | ٹیم | کھیلے | گول فرق | پوائنٹس |
|---|---|---|---|---|
| 1 |  برازیل |
3 | +6 | 7 |
| 2 |  مراکش |
3 | +3 | 7 |
| 3 |  اسکاٹ لینڈ |
3 | -3 | 3 |
| 4 |  ہیٹی |
3 | -6 | 0 |
واضح رہے کہ مراکش 2022 کے ورلڈ کپ میں سیمی فائنل تک رسائی حاصل کرنے والی پہلی عرب اور افریقی ٹیم بنی تھی، جبکہ 1986 میں بھی یہی ٹیم پہلی عرب و افریقی نمائندہ تھی جس نے میکسیکو میں گروپ مرحلہ عبور کر کے تاریخ رقم کی تھی۔