فیفا ورلڈ کپ 2026 کے افتتاحی گروپ میچ میں امریکا نے پیراگوئے کو 1-4 سے شکست دے کر کامیاب آغاز کیا۔
امریکی ٹیم نے ابتدا ہی سے کھیل پر مکمل کنٹرول رکھا، جبکہ فولارین بالوگون نے دو گول کرکے فتح میں کلیدی کردار ادا کیا۔
اس کامیابی کے ساتھ امریکا نے 3 اہم پوائنٹس حاصل کر لیے۔
فیفا ورلڈ کپ 2026 کے گروپ مرحلے میں میزبان امریکا نے اپنے پہلے ہی میچ میں بھرپور کھیل کا مظاہرہ کرتے ہوئے پیراگوئے کو 1-4 سے شکست دے دی۔
لاس اینجلس کے سوفی اسٹیڈیم میں کھیلے گئے اس مقابلے میں امریکی ٹیم نے ابتدا سے اختتام تک کھیل پر گرفت برقرار رکھی اور اپنے شائقین کو یادگار فتح کا تحفہ دیا۔
امریکا کو میچ کے ساتویں منٹ میں خوش قسمتی سے برتری حاصل ہوئی جب پیراگوئے کے مدافع ڈیمیان بوبادیا نے غلطی سے گیند اپنے ہی جال میں پہنچا دی۔
اس ابتدائی دھچکے کے بعد پیراگوئے دباؤ میں آ گیا جبکہ امریکی ٹیم نے مسلسل حملوں کا سلسلہ جاری رکھا۔
@fifaworldcup USA 🆚 Paraguay #FIFAWorldCup ♬ original sound - FIFA World Cup
31ویں منٹ میں امریکا نے اپنی برتری دگنی کر دی۔ کرسچن پولیسیچ کی شاندار معاونت پر فولارین بالوگون نے گیند کو جال کی راہ دکھائی اور اسکور 0-2 کر دیا۔
پہلے ہاف کے اختتام تک امریکی ٹیم مکمل طور پر حاوی رہی اور دو گول کی برتری کے ساتھ وقفے میں گئی۔
دوسرے ہاف کا آغاز بھی امریکا کے حق میں رہا۔
50 ویں منٹ میں فولارین بالوگون نے اپنا دوسرا اور ٹیم کا تیسرا گول اسکور کیا۔
مالک ٹل مین کی عمدہ پاس پر ہونے والے اس گول نے پیراگوئے کی واپسی کی امیدوں کو شدید دھچکا پہنچایا۔
اگرچہ پیراگوئے نے ہمت نہیں ہاری اور 73ویں منٹ میں موریسیو ماگالہائس پراڈو نے جولیو اینسیسو کی پاس پر گول کرکے خسارہ کم کر دیا، تاہم امریکی دفاع نے مزید نقصان سے خود کو محفوظ رکھا۔
گروپ D
میچ کے آخری لمحات میں امریکا نے ایک بار پھر اپنی برتری ثابت کی۔
اضافی وقت کے آٹھویں منٹ میں جیووانی رینا نے چوتھا گول اسکور کرکے فتح کو یقینی بنا دیا اور امریکی شائقین کے جشن کو دوبالا کر دیا۔
اعداد و شمار بھی امریکی برتری کی واضح عکاسی کرتے ہیں۔
امریکا نے 64 فیصد وقت گیند اپنے قبضے میں رکھی جبکہ پیراگوئے صرف 36 فیصد پوزیشن حاصل کر سکا۔ امریکی ٹیم نے 16 شاٹس لگائے جن میں 6 ہدف پر رہے، جبکہ پیراگوئے پورے میچ میں صرف ایک مرتبہ ہدف پر مؤثر شاٹ لگا سکا۔
@fifaworldcup LA nights hit different after a home win. 🙌🇺🇸 #FIFAWorldCup ♬ Living In A Haze (Instrumental) - Milky Chance
فولارین بالوگون اپنی دو گول کی شاندار کارکردگی کے باعث میچ کے بہترین کھلاڑی قرار پائے۔ انہیں 9.1 کی بلند ترین ریٹنگ دی گئی، جس کے بعد وہ ورلڈ کپ 2026 میں امریکا کے نمایاں ستاروں میں شامل ہو گئے ہیں۔
اس کامیابی کے ساتھ امریکا نے نہ صرف تین قیمتی پوائنٹس حاصل کیے بلکہ اپنے گروپ کے دیگر حریفوں کو بھی واضح پیغام دیا کہ میزبان ٹیم اس بار ٹورنامنٹ میں بڑا کردار ادا کرنے کی صلاحیت رکھتی ہے۔