دنیا بھر میں فٹ بال ورلڈ کپ جیتنے والے کھلاڑی نہ صرف اپنے ملک بلکہ اپنے متعلقہ کلبوں کے لیے بھی فخر کا باعث بنتے ہیں۔
مزید پڑھیں
شائقین فٹبال کے درمیان اکثر یہ بحث ہوتی رہتی ہے کہ کس کلب نے اب تک سب سے زیادہ عالمی چیمپئن کھلاڑی پیدا کیے ہیں۔
برطانوی ویب سائٹ ’Give Me Sport‘کی رپورٹ کے مطابق آئندہ جمعرات سے شروع ہونے والے فیفا ورلڈ کپ 2026 میں 1590 کلبوں کے 12 ہزار سے زائد کھلاڑی شریک ہوں گے۔
اس موقع پر عالمی چیمپئن کھلاڑیوں کے کلبز سے متعلق اہم ترین
تفصیلات اور اعداد و شمار سامنے آئے ہیں۔
اطالوی کلب یووینٹس اس فہرست میں 27 کھلاڑیوں کے ساتھ پہلے نمبر پر موجود ہے جنہوں نے کلب کی نمائندگی کے دوران ورلڈ کپ جیتا۔
اسی طرح جرمن کلب بائرن میونخ 24 کھلاڑیوں کے ساتھ دوسرے جبکہ اطالوی کلب انٹر میلان 17 کھلاڑیوں کے ساتھ تیسرے نمبر پر براجمان ہے۔
برازیل کے کلب سانتوس نے اب تک 15 عالمی چیمپئن کھلاڑی دیے ہیں جبکہ اٹلی کے کلب روما اور یوراگوئے کے بینارول کے 14، 14 کھلاڑی فاتح رہے۔
یوراگوئے کے نیشنل مونٹی ویڈیو، برازیل کے ساؤ پالو اور ہسپانوی کلب بارسلونا کے 13، 13 کھلاڑیوں نے ٹرافی اٹھائی۔
برازیل کے بوٹافوگو اور ہسپانوی دارالحکومت کے کلب ریال میڈرڈ کے 11، 11 کھلاڑیوں نے ورلڈ کپ جیتا۔
اٹلی کے اے سی میلان اور ارجنٹائن کے ریور پلیٹ کے 10، 10 کھلاڑیوں جبکہ جرمنی کے کولن اور برازیل کے پلمیراس کے 9، 9 کھلاڑیوں نے یہ اعزاز حاصل کیا۔
برازیل کے کورنتھینز اور اٹلی کے فیورینٹینا کے 8، 8 کھلاڑیوں نے عالمی ٹائٹل جیتا۔
انگلش کلب آرسنل، جرمنی کے ڈورٹمنڈ، برازیل کے فلیمنگو اور فلومینینسی سمیت ارجنٹائن کے انڈیپینڈینٹی کے 7، 7 کھلاڑیوں نے ورلڈ کپ کی ٹرافی اٹھانے کا اعزاز اپنے نام کر رکھا ہے۔
جرمنی کے بورشیا مونسن گلیڈباخ اور فرانسیسی کلب پیرس سینٹ جرمین کے 6، 6 کھلاڑی فاتح رہے۔
جرمنی کے کائزر سلاؤٹرن، اٹلی کے بولوگنا اور لازیو، انگلینڈ کے چیلسی، لیورپول اور مانچسٹر یونائیٹڈ سمیت اسپین کے ایٹلیٹیکو میڈرڈ، سیویلا اور ویلنسیا کے 5، 5 کھلاڑیوں نے ٹائٹل جیتا۔
فرانس کے اولمپک مارسیلیا اور موناکو کے علاوہ برازیل کے کروزیرو کے بھی 5، 5 کھلاڑیوں نے فٹ بال کی تاریخ کے سب سے بڑے عالمی میلے میں کامیابی حاصل کی۔
یہ اعداد و شمار ظاہر کرتے ہیں کہ یورپی اور لاطینی امریکی کلبوں نے فٹ بال کو عظیم ترین کھلاڑی فراہم کیے ہیں۔