گرمی کی شدت میں اضافے کے ساتھ ماہرینِ صحت نے 7 ایسے موسمی پھلوں کی نشاندہی کی ہے جو جسم کو ہائیڈریٹ رکھنے، قوتِ مدافعت مضبوط بنانے اور مختلف بیماریوں سے بچاؤ میں اہم کردار ادا کرتے ہیں۔
ان میں تربوز، خربوزہ، آڑو، چیری، بلیو بیری، اسٹرابیری اور آم شامل ہیں۔
گرمی کی شدت میں اضافے کے ساتھ ماہرینِ صحت نے ایسے 7 بہترین موسمی پھلوں کی نشاندہی کی ہے جو جسم کو ہائیڈریٹ رکھنے، قوتِ مدافعت مضبوط بنانے اور ضروری غذائی اجزا کم لاگت میں فراہم کرنے میں مددگار ثابت ہوتے ہیں۔
تربوز اور خربوزہ
تربوز گرمیوں کا سب سے مقبول پھل سمجھا جاتا ہے۔
اس میں تقریباً 91 فیصد پانی موجود ہوتا ہے، جو جسم میں پانی کی کمی دور رکھنے میں مدد دیتا ہے۔
اس کے علاوہ تربوز وٹامن اے، وٹامن سی اور طاقتور اینٹی آکسیڈنٹ ’لائیکوپین‘ فراہم کرتا ہے، جو خلیات کو نقصان سے بچانے میں معاون ہے۔
ماہرین کے مطابق بہترین تربوز وہ ہوتا ہے جو اپنے حجم کے مقابلے میں زیادہ بھاری محسوس ہو اور اس پر زرد رنگ کا دھبہ موجود ہو، جو اس کے قدرتی طور پر پکنے کی علامت ہے۔
خربوزہ ’کنٹالوپ‘ بھی غذائیت سے بھرپور پھل ہے۔
اس میں تقریباً 90 فیصد پانی، بیٹا کیروٹین، وٹامن سی، میگنیشیم اور پوٹاشیم پایا جاتا ہے، جو قوتِ مدافعت کو بہتر بنانے میں مدد دیتے ہیں۔
آڑو اور چیری: دل کی صحت اور بہتر نیند
آڑو گرمیوں کے اہم پھلوں میں شمار ہوتا ہے۔
اس میں موجود پوٹاشیم، فائبر اور اینٹی آکسیڈنٹس دل کی صحت کو بہتر بنانے اور جسم میں سوزش کم کرنے میں مددگار ہوتے ہیں۔
میٹھی چیری قدرتی طور پر میلاٹونن فراہم کرتی ہے، جو بہتر اور پُرسکون نیند میں معاون ثابت ہو سکتی ہے۔
اس کے علاوہ چیری میں موجود اینٹی آکسیڈنٹس دائمی بیماریوں سے تحفظ میں کردار ادا کرتے ہیں۔
ماہرین مشورہ دیتے ہیں کہ چیری کو صرف استعمال سے قبل دھویا جائے تاکہ اس کی تازگی برقرار رہے۔
بیریز اور آم: دماغ اور نظامِ ہاضمہ کے لیے مفید
بلیو بیری اینتھو سائنن سے بھرپور ہوتی ہے، جو دماغی صحت کو بہتر بنانے اور دل کے امراض کے خطرات کم کرنے میں مدد دیتی ہے۔
اسٹرابیری کا ایک کپ روزانہ درکار وٹامن سی کا تقریباً 94 فیصد فراہم کرتا ہے، جو ایک درمیانے سائز کے سنگترے سے بھی زیادہ ہے۔
آم فائبر، پولی فینولز اور دیگر غذائی اجزا سے مالا مال ہوتا ہے، جو آنتوں میں موجود مفید بیکٹیریا کی نشوونما اور نظامِ ہاضمہ کی بہتری میں اہم کردار ادا کرتے ہیں۔
موسمی پھل کھانے کے 3 بڑے فوائد
ماہرین کے مطابق موسمی پھل استعمال کرنے کے 3 نمایاں فوائد ہیں:
- بہتر ذائقہ اور خوشبو: موسمی پھل قدرتی طور پر زیادہ میٹھے اور رسیلے ہوتے ہیں۔
- زیادہ غذائیت: تازہ پھلوں میں وٹامنز اور معدنیات کی مقدار نسبتاً زیادہ ہوتی ہے۔
- کم قیمت: فصل کی فراوانی کے باعث موسمی پھل نسبتاً سستے اور آسانی سے دستیاب ہوتے ہیں۔
ماہرین کا کہنا ہے کہ مقامی اور تازہ پھل نہ صرف صحت کے لیے زیادہ فائدہ مند ہوتے ہیں بلکہ بہتر ذائقہ اور کم لاگت کا بھی بہترین ذریعہ ہیں۔