اسمارٹ فون مارکیٹ میں ڈسپلے ٹیکنالوجی کا مقابلہ شدت اختیار کر گیا ہے۔
مزید پڑھیں
ون پلس اپنی اگلی جنریشن کے فونز میں شاندار ویژول تجربے کے لیے 2K ریزولوشن اور 240 ہرٹز ریفریش ریٹ جیسی جدید خصوصیات متعارف کروانے کی منصوبہ بندی کر رہی ہے جو موبائل انڈسٹری میں ایک نیا سنگ میل ہوگا۔
ریفریش ریٹ میں بتدریج اضافہ
یاد رہے کہ اس سے پہلے ون پلس 15 مارکیٹ میں 1.5K ریزولوشن اور
165 ہرٹز ڈسپلے کے ساتھ صارفین کو اپنی جانب متوجہ کر چکا ہے
اب توقع ہے کہ آنے والے ون پلس 16 میں ریفریش ریٹ کو 185 ہرٹز تک بڑھایا جائے گا، جس کے بعد مستقبل میں اسے 240 ہرٹز تک لے جانے کا پلان ہے۔
ٹیکنالوجی اور کارکردگی کا چیلنج
ماہرین کے مطابق 2K ڈسپلے کے ساتھ انتہائی ہائی ریفریش ریٹ فراہم کرنا ایک بڑا تکنیکی چیلنج ہے۔
کمپنی نے اس بات کو یقینی بنانا ہے کہ اعلیٰ کارکردگی کے دوران بیٹری لائف، توانائی کی کھپت، حرارتی نظام اور تصویر کا معیار متاثر نہ ہو، کیونکہ فی الحال مارکیٹ میں موجود 2K ڈسپلے 144 ہرٹز تک محدود ہیں۔
ون پلس 17 اور مستقبل کے امکانات
اس حوالے سے اگرچہ کوئی باضابطہ اعلان نہیں ہوا ہے، لیکن ماہرین کا خیال ہے کہ 2027 میں آنے والا ون پلس 17 پہلا ایسا ماڈل ہو سکتا ہے جو 2K ریزولوشن کے ساتھ 185 یا 240 ہرٹز ریفریش ریٹ کا امتزاج پیش کرے۔
مارکیٹ ذرائع کے مطابق یہ اپ گریڈ کمپنی کو فلیگ شپ مارکیٹ میں منفرد مقام دلائے گی۔
صارفین کے لیے اس کی افادیت
عام صارفین کے لیے 120 ہرٹز سے زیادہ ریفریش ریٹ کا فرق محسوس کرنا مشکل ہو سکتا ہے۔
تاہم گیمنگ کے شوقین افراد کے لیے یہ فیچر انتہائی اہم ہے، کیونکہ اس سے اسکرین پر موومنٹ کی روانی، ٹچ رسپانس میں بہتری اور گیمنگ کے دوران لیگ میں نمایاں کمی آتی ہے۔
عالمی مقابلہ اور مارکیٹ کا رجحان
واضح رہے کہ ون پلس اس دوڑ میں تنہا نہیں ہے۔ ریڈمی کا K100 پرو اور آئی کیو او او 16 جیسے اسمارٹ فونز بھی 185 ہرٹز ڈسپلے کے ساتھ مارکیٹ میں آنے والے ہیں۔
یہی وجہ ہے کہ کمپنیاں اب کیمروں اور چارجنگ کے بعد ڈسپلے کی کارکردگی اور گیمنگ کے تجربے پر اپنی پوری توجہ مرکوز کر رہی ہیں۔
صارفین کا ماننا ہے کہ اسمارٹ فون انڈسٹری کا مرکز اب ہائی اینڈ ڈسپلے ٹیکنالوجی بن چکا ہے۔
اگر ون پلس جیسی کمپنیاں توانائی کی کھپت کو کنٹرول کرتے ہوئے 2K ڈسپلے اور 240 ہرٹز کو ایک ساتھ کامیابی سے متعارف کراتی ہیں، تو اس سے مستقبل کے اسمارٹ فونز کے معیارات میں ایک نیا اور انقلابی دور شروع ہو جائے گا۔