امریکی وزیر خزانہ اسکاٹ بیسنٹ نے جمعہ کے روز اعلان کیا ہے کہ ایران کے خلاف صدر ٹرمپ کی معاشی جنگ کے ایک حصے کے طور پر ایک ارب ڈالر مالیت کے ایرانی کرپٹو کرنسی اثاثے کامیابی سے ضبط کر لیے گئے ہیں۔
مزید پڑھیں
بین الاقوامی میڈیا رپورٹس کے مطابق اس سے قبل گزشتہ ماہ امریکی وزارت خزانہ کے دفتر برائے غیر ملکی اثاثہ جات کنٹرول (او ایف اے سی) نے ایران سے وابستہ متعدد الیکٹرانک والٹس پر پابندیاں عائد کی تھیں، جس کے نتیجے میں 344 ملین ڈالر مالیت کی کرپٹو کرنسی منجمد کر دی گئی تھی۔
وزیر خزانہ اسکاٹ بیسنٹ نے واضح کیا کہ یہ حالیہ اقدامات تہران کو
فنڈز کی فراہمی، ان کی منتقلی اور رقم کی وطن واپسی سے روکنے کی مسلسل کوششوں کا حصہ ہیں۔
انہوں نے اس عزم کا اعادہ کیا کہ ایران کو مالیاتی وسائل سے محروم رکھا جائے گا۔
امریکی وزیر خزانہ کے مطابق یہ تمام کارروائیاں معاشی جنگ کی مہم کے تحت کی جا رہی ہیں۔
اس مہم کا بنیادی مقصد منظم طریقے سے ایران کی اپنے مالیاتی وسائل تک رسائی کو مکمل طور پر روکنا اور اسے معاشی طور پر کمزور کرنا ہے۔
اسکاٹ بیسنٹ نے مزید کہا کہ امریکہ ان تمام فنڈز کا پیچھا کرے گا جنہیں تہران حکومت ملک سے باہر نکالنے کی کوشش کرے گی۔
انہوں نے کہا کہ واشنگٹن مستقبل میں بھی ایران سے وابستہ فنڈنگ کے مختلف ذرائع کو نشانہ بنانے کے لیے اپنی کارروائیوں کا دائرہ کار وسیع کرے گا۔