عرفہ کے دن جب لاکھوں حجاج میدانِ عرفات میں رکنِ اعظمِ حج ادا کر رہے ہوتے ہیں، مسجد الحرام میں ایک منفرد مکی روایت ’یومُ الخلیف‘ زندہ ہوا کرتی ہے۔
اس دن مکہ کی خواتین حرمِ مکی کا رخ کرتی ہیں، عبادت، طواف، دعا اور افطارِ صائم کے ذریعے ایک روحانی اور تہذیبی روایت کو زندہ رکھتی ہیں، جو نسل در نسل منتقل ہوتی آ رہی ہے۔
وقوفِ عرفہ کے روح پرور منظر کے ساتھ، جب لاکھوں حجاج بیت اللہ حج کے عظیم ترین رکن کی ادائیگی کے لیے میدانِ عرفات کی جانب رواں دواں ہوتے ہیں اور جبلِ رحمت سفید احراموں کی نورانی چادر اوڑھ لیتا ہے، عین اسی وقت مسجد الحرام میں ایک اور دلکش اور منفرد منظر آنکھوں کو اپنی جانب کھینچ لیتا ہے۔
حرمِ مکی کے وسیع صحن سیاہ عباؤں میں ملبوس مکہ کی خواتین سے بھر جاتے ہیں اور یوں ایک قدیم مکی روایت ’یومُ الخلیف‘ اپنی پوری روحانیت کے ساتھ زندہ ہو اٹھتی ہے۔
اہلِ مکہ کے نزدیک ’یوم الخلیف‘ وقوفِ عرفہ کے دن کو کہا جاتا ہے۔
اس روز جب حجاج میدانِ عرفات کی طرف روانہ ہو جاتے ہیں، مسجد الحرام میں نسبتاً ازدحام کم ہو جاتا ہے اور یہی وقت مکہ کی خواتین کے لیے ایک نادر اور قیمتی موقع بن جاتا ہے۔
وہ جوق در جوق حرمِ مکی کا رخ کرتی ہیں، نماز، دعا، طواف اور ذکر و عبادت میں مشغول ہو کر ایسی روحانی ساعتوں سے فیض یاب ہوتی ہیں جو سال بھر شاید دوبارہ نصیب نہ ہوں۔
اس دن خواتین کو بیت اللہ کے زیادہ قریب ہونے، حجرِ اسود کے بوسے لینے، ملتزم کے پاس دعاؤں میں مشغول ہونے اور کعبۃ اللہ کے سائے میں طویل وقت گزارنے کا منفرد موقع ملتا ہے۔ یوں ایک دل آویز منظر جنم لیتا ہے، ایک طرف میدانِ عرفات میں سفید لباسوں میں ملبوس لاکھوں حجاج اور دوسری جانب خانۂ کعبہ کے گرد سیاہ عباؤں کا روح پرور ہجوم، گویا ایمان، عقیدت اور محبتِ الٰہی کی دو تصویریں ایک ہی وقت میں جلوہ گر ہو رہی ہوں۔
’یوم الخلیف‘ محض عبادت کا نام نہیں، بلکہ یہ مکہ مکرمہ کی تہذیبی اور سماجی میراث کا بھی ایک خوبصورت باب ہے۔
برسوں سے مکہ کی خواتین اس دن مسجد الحرام میں قیام، عبادت، روزہ داروں کے لیے افطار کا اہتمام اور اللہ کے گھر سے قلبی تعلق کی تجدید کو اپنی روایت کا حصہ بنائے ہوئے ہیں، خصوصاً ایسے وقت میں جب بہت سے مرد حضرات حجاج کی خدمت، طوافہ اور مشاعرِ مقدسہ کی ذمہ داریوں میں مصروف ہوتے ہیں۔
’الخلیف‘ کی تسمیہ کے بارے میں بھی مختلف روایتیں ملتی ہیں۔
ایک روایت کے مطابق قدیم زمانے میں خواتین مردوں کی عدم موجودگی میں گھریلو امور سنبھالتی تھیں، بزرگوں اور کمزور افراد کی خدمت کرتیں، گھروں کی حفاظت کرتیں اور سماجی ذمہ داریاں نبھاتیں۔
جبکہ ایک دوسری روایت یہ بتاتی ہے کہ ’الخلیف‘ اس لیے کہا جاتا ہے کہ اس دن خواتین مسجد الحرام میں مردوں کی جگہ عبادت اور خدمت کے جذبے کو زندہ رکھتی ہیں۔
گویا یہ مردوں کا ’خلف‘ ہوں۔
آج بھی مکہ کی بہت سی خواتین نسل در نسل اس روایت کو سنبھالے ہوئے ہیں۔
ان کے لیے یہ محض ایک معمول نہیں، بلکہ اپنی ماؤں اور بزرگوں سے جڑی ایک محبت بھری یاد، حرمِ پاک سے تعلق کا اظہار اور مکی تہذیب کی حفاظت کا ایک خوبصورت احساس ہے۔ صبح سویرے خاندانوں کا جمع ہونا، حرم کی جانب روانگی، طواف، عبادت، افطار کا اہتمام اور غروبِ آفتاب تک روحانیت میں ڈوبے رہنا، ’یوم الخلیف‘ کو ایک یادگار دن بنا دیتا ہے۔
وقت کے ساتھ اگرچہ بعض روایات میں تبدیلیاں آئیں، جیسے غلافِ کعبہ کی تبدیلی کا وقت یومِ عرفہ سے یکم محرم منتقل کر دیا گیا، لیکن ’یوم الخلیف‘ آج بھی اپنی پوری آب و تاب کے ساتھ زندہ ہے، مکہ کی روح، اس کی تہذیب اور حرمِ مکی سے اہلِ مکہ کی والہانہ وابستگی کی ایک خوبصورت اور لازوال علامت بن کر۔
یوم الخلیف میں حرم میں جمع ہونے والی مکی خواتین کو ’مونسات الحرم‘ کہا جاتا ہے۔
یوم عرفہ کو جب تمام حاجی میدان عرفات میں ہوتے ہیں، مکہ کے تمام مرد وہاں حاجیوں کی خدمت میں مصروف ہوتے ہیں، اس وقت حرم طواف کرنے والوں، رکوع و سجود کرنے والوں سے خالی ہوتا ہے۔
اس وقت یہ خواتین آتی ہیں اور حرم کی گویا ’تنہائی‘ کو دور کردیتی ہے، کعبے کو انسیت پہنچاتی ہیں۔