سام سنگ دنیا میں اینڈرائیڈ اسمارٹ فونز بنانے والی صف اول کی کمپنی ہے، جو اپنے صارفین کو سیکیور فولڈر اور اسمارٹ ہوم جیسے جدید فیچرز فراہم کرتی ہے۔
مزید پڑھیں
تاہم، صارفین اکثر یہ سوال کرتے ہیں کہ گلیکسی اے سیریز کی قیمت ایس سیریز کے مقابلے میں اتنی کم کیوں رکھی جاتی ہے۔
سام سنگ اپنی مصنوعات کو واضح درجات (اقسام) میں تقسیم کرنے کی حکمت عملی پر عمل پیرا ہے۔
گلیکسی ایس سیریز کمپنی کے فلیگ شپ فونز پر مشتمل ہے جن میں جدید ترین ٹیکنالوجی، طاقتور پروسیسر اور بہترین کیمرے دیے جاتے
ہیں جبکہ اے سیریز مناسب قیمت میں بہتر کارکردگی فراہم کرنے کے لیے بنائی گئی ہے۔
قیمتوں کے لحاظ سے دونوں سیریز میں نمایاں فرق پایا جاتا ہے۔
گلیکسی اے سیریز کے فونز عام طور پر 200 سے 550 ڈالر کے درمیان دستیاب ہوتے ہیں، جبکہ ایس سیریز کی قیمت 650 ڈالر سے شروع ہو کر الٹرا ماڈلز کے لیے 1600 ڈالر سے بھی تجاوز کر جاتی ہے۔
ہارڈ ویئر کے لحاظ سے ایس سیریز میں انتہائی طاقتور اور جدید ترین پروسیسرز استعمال کیے جاتے ہیں۔
ان فونز کی تیاری میں شیشے اور دھات جیسے مہنگے اور معیاری مواد کا استعمال کیا جاتا ہے، جبکہ اے سیریز میں لاگت کم رکھنے کے لیے ڈیزائن اور مٹیریل میں کچھ سمجھوتہ کیا جاتا ہے۔
اسی طرح کیمرہ ٹیکنالوجی اور ڈسپلے کے معیار میں بھی واضح فرق موجود ہے۔
ایس سیریز میں پیشہ ورانہ فوٹوگرافی کے لیے جدید سینسرز اور زیادہ برائٹنس والی اسکرینیں دی جاتی ہیں۔ اس کے علاوہ بعض ماڈلز میں ایس پین جیسی اضافی خصوصیات بھی صرف فلیگ شپ فونز تک محدود رکھی گئی ہیں۔
بیٹری کے معاملے میں اے 55 جیسے فونز میں بڑی بیٹریاں دی گئی ہیں، لیکن ایس 25 اپنی بہتر پروسیسر کارکردگی کی وجہ سے زیادہ وقت تک چلنے کی صلاحیت رکھتا ہے۔
یہ فرق ظاہر کرتا ہے کہ صرف بیٹری کا سائز نہیں بلکہ اندرونی پرزوں کی کارکردگی بھی اہمیت رکھتی ہے۔
سام سنگ اب بتدریج اے سیریز میں بھی فلیگ شپ فیچرز متعارف کروا رہا ہے۔
ماضی میں پانی سے بچاؤ کی آئی پی 68 ریٹنگ اور فاسٹ چارجنگ صرف ایس سیریز تک محدود تھی، لیکن اب یہ سہولیات اے سیریز کے نئے ماڈلز میں بھی صارفین کو فراہم کی جا رہی ہیں۔
سال 2026 کے نئے ماڈل گلیکسی اے 57 فائیو جی میں مصنوعی ذہانت اور کیمرے کی بہتر ٹیکنالوجی شامل کی گئی ہے۔
اگرچہ یہ فون پرانے ایس ماڈلز کے قریب پہنچ چکا ہے، لیکن کارکردگی اور طویل مدتی اپ ڈیٹس کے معاملے میں ایس سیریز اب بھی سبقت رکھتی ہے۔
ماہرین کا کہنا ہے کہ صارفین کے لیے انتخاب کا دارومدار ان کی ضرورت پر ہے۔
اگر آپ سوشل میڈیا اور عام استعمال کے لیے فون چاہتے ہیں تو اے سیریز بہترین ہے، لیکن پیشہ ورانہ فوٹو گرافی اور انتہائی طاقتور کارکردگی کے خواہش مند افراد کے لیے گلیکسی ایس سیریز ہی موزوں ترین انتخاب ہے۔