کینیڈا کے شہر وینکوور نے فیفا ورلڈ کپ 2026 کی میزبانی کے لیے اپنی مشہور عمارت ’سائنس ورلڈ‘کی گنبد نما چھت کو فٹ بال کے دیوہیکل نمونے میں تبدیل کرنے کا باقاعدہ آغاز کر دیا ہے تاکہ عالمی سطح پر اپنی تاریخی شناخت بنا سکے۔
مزید پڑھیں
اس منصوبے کے تحت عمارت کو ایڈیڈاس کی تیار کردہ آفیشل فٹ بال ’ٹریونڈا‘ کی شکل دی جائے گی، جو 2026 کے ورلڈ کپ کے لیے امریکہ، کینیڈا اور میکسیکو کے درمیان اتحاد کی علامت کے طور پر خصوصی طور پر بنائی گئی ہے۔
وینکوور کی یہ مشہور جیودیسک گنبد نما عمارت 40 میٹر قطر پر محیط ہے، جسے اب 131 خصوصی طور پر تیار کردہ آرٹ پینلز سے ڈھانپا جا
رہا ہے تاکہ یہ فٹ بال کے عالمی میلے کی ایک بڑی علامت کے طور پر ابھر سکے۔
بدھ کے روز شروع ہونے والے اس کام کو مکمل کرنے کے لیے 4 ہفتوں کا وقت مقرر کیا گیا ہے، جس کے بعد جون 2026 کے اوائل میں اس کا حتمی منظر سامنے آئے گا۔
ٹورازم وینکوور کے سی ای او روئس چوئن کے مطابق اس تبدیلی کا مقصد ایک ایسی عالمی علامت تخلیق کرنا ہے جو میزبانی کے حوالے سے شہر کی تخلیقی صلاحیتوں اور بلند حوصلوں کو فیفا کی آفیشل ویب سائٹ پر نمایاں طور پر پیش کر سکے۔
اس منفرد تبدیلی کے ساتھ ساتھ سائنس ورلڈ میں 15 مئی سے 7 ستمبر 2026 تک فیفا میوزیم کی جانب سے ’فٹ بال اور ٹیکنالوجی‘ کی نمائش بھی منعقد کی جائے گی، جو شمالی امریکہ کے براعظم میں اپنی نوعیت کی پہلی نمائش ہوگی۔
اس نمائش کے ذریعے فٹ بال کے کھیل میں وقت کے ساتھ آنے والی جدت اور ٹیکنالوجی کے کردار کو اجاگر کیا جائے گا، جس سے شائقین کو کھیل کے ارتقائی سفر، جدید ایجادات اور مستقبل کے تقاضوں کو گہرائی سے سمجھنے میں مدد ملے گی۔