عام طور پر ہم پھلوں کے چھلکوں کو کوڑا سمجھ کر پھینک دیتے ہیں، لیکن تازہ ترین تحقیقی نتائج بتاتے ہیں کہ ان چھلکوں کا دانشمندانہ استعمال ہماری خوراک کو زیادہ مفید بنا سکتا ہے۔
مزید پڑھیں
محققین نے دریافت کیا ہے کہ کچھ مخصوص پھلوں کے چھلکوں میں پائے جانے والے قدرتی رنگ (پگمنٹس) نہ صرف پکائی کے عمل کے دوران اپنی خصوصیات برقرار رکھتے ہیں، بلکہ یہ عام روٹی کی غذائیت میں بھی نمایاں اضافہ کر سکتے ہیں۔
جریدے فوڈ کیمسٹری (Food Chemistry) میں شائع ہونے والی ایک تحقیق کے مطابق ایک اوسط فرد سالانہ 24 کلوگرام روٹی استعمال کرتا
ہے، یعنی ہفتہ وار نصف کلوگرام سے زائد۔
سائنسدانوں کا کہنا ہے کہ انہوں نے ایک ایسا طریقہ دریافت کیا ہے جس سے روٹی کو نہ صرف زیادہ غذائیت بخش، بلکہ ذائقہ دار بھی بنایا جا سکتا ہے۔
حیاتیاتی طور پر فعال مرکبات
سنگاپور کی نیشنل یونیورسٹی کے محققین، جن کی قیادت پروفیسر ژو ویبیاؤ (Zhou Weibiao) کر رہے ہیں، نے سرخ ڈریگن فروٹ کے چھلکوں سے حیاتیاتی طور پر فعال مرکبات نکال کر براہ راست روٹی کے آٹے میں شامل کرنے کے تجربات کیے ہیں۔
اس مطالعے سے یہ بات سامنے آئی ہے کہ ان مرکبات سے تیار کردہ روٹی میں موجود اینٹی آکسیڈنٹس کی مقدار عام سفید روٹی کے مقابلے میں 3 گنا زیادہ ہوتی ہے۔
اس کے علاوہ اس روٹی کا گلیسیمک انڈیکس (Glycemic Index) بھی کم ہوتا ہے، جو خون میں شوگر کی سطح کو کنٹرول کرنے میں مددگار ہے۔
سب سے اہم بات کہ یہ فوائد پکائی کے بعد ہی نہیں، بلکہ نظام انہضام میں جانے کے بعد بھی برقرار رہتے ہیں۔
بیٹاسیانین: ایک اہم جزو
محققین کی ٹیم نے وضاحت کی کہ اس عمل کا مرکزی جزو بیٹاسیانین (Betacyanin) سے بھرپور عرق ہے، جسے ڈریگن فروٹ کے ان چھلکوں سے نکالا جاتا ہے جنہیں عام طور پر ضائع کر دیا جاتا ہے۔
بیٹاسیانین وہی قدرتی رنگ ہے جو ڈریگن فروٹ کو اس کی شوخ رنگت دیتا ہے۔
محققین کے مطابق یہ مرکبات عام درجہ حرارت اور کھانوں میں پائے جانے والے تیزابی اثرات میں انتہائی مستحکم (Stable) رہتے ہیں اور پانی میں آسانی سے حل ہو جاتے ہیں، جس کی وجہ سے انہیں روٹی کے آٹے میں شامل کرنا بہت آسان ہے۔
یہ مرکبات چقندر، سوئس چارڈ (پالک کی ایک قسم) اور کانٹے دار ناشپاتی (Prickly Pear) میں بھی ہوتے ہیں۔
متعدد فوائد
تحقیقی ٹیم نے گندم کے آٹے میں اس عرق کی مختلف مقداروں کا تجربہ کیا اور پایا کہ 0.75 فیصد کا ارتکاز سب سے بہترین ہے۔
اس مقدار سے تیار ہونے والی روٹی عام سفید روٹی کی نسبت زیادہ نرم تھی اور اسے چبانا آسان تھا۔
پروفیسر ژو ویبیاؤ نے اس پیشرفت پر تبصرہ کرتے ہوئے کہا کہ روٹی جیسی بنیادی غذاؤں کو ایسے قدرتی عرق کے ساتھ تقویت دینا، روزمرہ کی خوراک میں صحت بخش مرکبات شامل کرنے کا ایک عملی طریقہ ہے۔
دنیا بھر میں ذیابیطس کے بڑھتے ہوئے کیسز کے پیشِ نظر، عام استعمال کی اشیا کی غذائی قدر میں اضافہ کرنا، ہماری غذائی عادات کو یکسر بدلے بغیر شوگر کے بوجھ کو کم کرنے اور اینٹی آکسیڈنٹس کے حصول کا بہترین ذریعہ ثابت ہو سکتا ہے۔