ولی عہد و وزیر اعظم شہزادہ محمد بن سلمان بن عبد العزیز آل سعود نے کہا ہے کہ وژن 2030 کے تحت جامع ترقی کے ایک عشرے کے بعد، مملکت نے ایک غیر معمولی مثال قائم کی ہے کہ کس طرح وژن کو حقیقت میں بدلا جا سکتا ہے اور یہ سب اس وطن کے بیٹوں اور بیٹیوں کے عزم اور مؤثر اداروں کی بدولت ممکن ہوا۔
سعودی پریس ایجنسی کے مطابق انہوں نے یہ بات وژن 2030 کی سالانہ رپورٹ 2025 کے تناظر میں میں کہی ہے جس کا آغاز آج سے 10 سال قبل 2016 میں کیا گیا تھا۔
معیشت کی مضبوطی اور تنوع میں اضافہ ہوا ہے
ولی عہد نے کہا ہے کہ گزشتہ برسوں میں حاصل کی گئی کامیابیاں ہمیں اس بات کی بڑی ذمہ داری دیتی ہیں کہ ہم اپنی کوششوں کو دوگنا کریں، اپنے منصوبوں اور وسائل کو مزید مضبوط بنائیں تاکہ حاصل شدہ کامیابیوں کو برقرار رکھا جا سکے اور ان کے اثرات کو پائیدار بنایا جا سکے، جبکہ ہمارا ہدف اپنے وطن اور عوام کی مزید ترقی اور سربلندی ہے۔
2016 میں آغاز کے بعد سے وژن 2030 نے ترقی کے تمام شعبوں میں نمایاں تبدیلیاں پیدا کی ہیں اور اپنے دسویں سال میں اس کے اثرات واضح طور پر نظر آتے ہیں، جن میں انسانی وسائل کو بااختیار بنانا، معیشت کی ترقی، کارکردگی میں بہتری اور مملکت کی عالمی حیثیت میں اضافہ شامل ہے۔
اسی تناظر میں وژن 2030 نے ہمہ جہت تبدیلی کے حصول کے لیے 3 بنیادی ستون متعین کیے ہیں:
سماجی ترقی، اقتصادی ترقی، اور عالمی سطح پر مملکت کی مسابقتی حیثیت۔
ایک طویل المدتی وژن ہونے کے ناطے، اس کی بنیاد پائیداری اور لچک پر رکھی گئی ہے تاکہ بدلتے حالات کے مطابق حکمت عملی اختیار کرتے ہوئے ہر سطح پر ترقی اور خوشحالی کو فروغ دیا جا سکے۔