خادم الحرمین الشریفین شاہ سلمان بن عبد العزیز آل سعود نے کہا ہے کہ سعودی عرب وژن 2030 کی کامیابیوں کے ساتھ بہتر مستقبل کی جانب گامزن ہے۔
انہوں نے کہا کہ 10 سال قبل وژن کے آغاز کے بعد ہمارا ملک صلاحیتوں، وسائل اور خصوصیات کے مؤثر استعمال کے ذریعے جامع ترقی کی مثال بن رہا ہے، جس کے اثرات عوام واضح طور پر محسوس کر رہے ہیں۔
وژن 2030 کے اجرا کو 10 سال مکمل، ترقی کا سفر تیز تر
یہ بات خادم الحرمین الشریفین نے وژن 2030 کی سالانہ رپورٹ کے اجرا کے موقع پر کہی ہے جو آج ہفتے کو جاری کی گئی۔
رپورٹ کے مطابق وژن 2030 کے پروگرامز اور منصوبے دسویں سال میں مضبوط ادارہ جاتی فریم ورک اور پختگی کے ساتھ مسلسل آگے بڑھ رہے ہیں، اور ہر سال کی کامیابیوں پر تعمیر کرتے ہوئے عمل درآمد جاری ہے۔
2016 میں سعودی وژن 2030 کے آغاز کے بعد، مملکت نے اپنی معیشت کی ازسرِ نو تشکیل کے لیے جامع اور مربوط اسٹریٹجک حکمت عملی اپنائی، جس کے تحت مختلف شعبوں اور خطوں کو ہدف بنانے والی قومی حکمت عملیوں کا آغاز کیا گیا۔
رپورٹ کے مطابق وژن کے نفاذ کے پروگرامز نے مختلف اداروں کے درمیان تعاون کو فروغ دیا، کام کی رفتار کو تیز کیا اور کئی اہداف کے حصول میں مدد دی۔
اس کے علاوہ ان پروگرامز نے ادارہ جاتی صلاحیتوں اور مہارتوں کی تعمیر میں کردار ادا کیا اور سرکاری اداروں کو پائیدار ترقی اور مسلسل بہتری کے لیے ضروری اوزار اور فریم ورک فراہم کیے۔