وزارت داخلہ نے آج ہفتے کو مکہ مکرمہ میں تین سعودی شہریوں پر منشیات کی ترسیل اور فروخت کے جرم میں سزائے موت کا فیصلہ نافذ کیا۔
سعودی پریس ایجنسی کے مطابق وزارت نے کہا ہے کہ سعودی شہری ناصر بن صقیر بن وخیضر السلمی اور حسان بن عابد بن علی السلمی نے نشہ آور گولیاں اسمگل کیں اور جبکہ جمال بن سعد بن فہید العتیبی نے ایمفیٹامین کی گولیاں فروخت کی ہیں۔
مزید پڑھیں
سیکیورٹی اداروں نے مذکورہ افراد کو گرفتار کیا اور تحقیقات کے بعد انہیں متعلقہ عدالت میں پیش کیا گیا۔
عدالت نے جرم کی تصدیق کے بعد تعزیرًا موت کا حکم سنایا جو اپیل کے بعد اعلیٰ عدالت نے بھی برقرار رکھا اور اس کے نفاذ کے لیے شاہی حکم جاری ہوا ہے۔
ایوان شاہی کی منظوری کے بعد عدالت کا فیصلہ نافذ کردیا گیا ہے۔
وزارت داخلہ نے عوام کو یقین دلایا کہ حکومت شہریوں اور مقیم افراد کو منشیات کے نقصانات سے بچانے کے لیے سخت ترین قانونی اقدامات کرتی ہے اور منشیات کے اسمگلرز و فروخت کنندگان کو سخت سزا دی جائے گی۔