جنگ بندی کے اختتام سے چند گھنٹے قبل پاکستانی وزیرِ اطلاعات عطا اللہ تارڑ نے کہا کہ اسلام آباد اب بھی ایران کی جانب سے باضابطہ جواب کا انتظار کر رہا ہے کہ آیا وہ امریکہ کے ساتھ امن مذاکرات کے دوسرے دور میں شرکت کی تصدیق کرے گا یا نہیں۔
تارڑ نے ایکس پر کہا ہے کہ جنگ بندی کے خاتمے سے پہلے ایران کا مذاکرات میں شرکت کا فیصلہ نہایت اہم ہے۔
مزید کہا کہ پاکستان نے ایرانی قیادت کو دوسرے دور میں شرکت پر آمادہ کرنے کے لیے بھرپور کوششیں کی ہیں۔
مزید پڑھیں
اس سے قبل پاکستانی وزارتِ خارجہ نے ایک بیان میں کہا کہ پاکستان نے امریکہ اور ایران پر زور دیا ہے کہ وہ دو ہفتوں پر مشتمل جنگ بندی میں توسیع کریں۔
یاد رہے کہ امریکہ اور ایران کے درمیان جنگ بندی آج منگل کو 23:50 بجے (گرین وچ ٹائم) پر ختم ہو رہی ہے۔
بیان کے مطابق پاکستانی وزیرِ خارجہ اسحاق ڈار نے پاکستان میں
امریکی سفارت خانے کی ناظم الامور نیٹالی اے بیکر سے ملاقات کے دوران امریکہ اور ایران کے درمیان رابطے کی اہمیت پر زور دیا اور دونوں فریقین کو جنگ بندی میں توسیع پر غور کرنے کی ترغیب دی۔
ایک سرکاری پاکستانی ذریعے نے العربیہ ٹی وی چینل کو بتایا کہ مذاکرات کا دوسرا دور اپنے مقررہ وقت پر ہوگا اور امریکہ و ایران کے وفود آج بیک وقت اسلام آباد پہنچ رہے ہیں۔
تاہم، ذریعے نے کہا کہ فی الحال جنگ بندی میں توسیع کے بارے میں کوئی معلومات نہیں ہیں۔
دوسری جانب پاکستانی ذرائع نے مقامی میڈیا کو بتایا کہ وزیرِ اعظم شہباز شریف آج منگل کو جنگ بندی میں توسیع کا اعلان کر سکتے ہیں۔
ذرائع کے مطابق اسلام آباد نے واشنگٹن اور تہران سے دو ہفتوں کی مزید مہلت دینے کی درخواست کی ہے۔
اسی تناظر میں اسلام آباد میں سیکیورٹی کے غیر معمولی اقدامات کیے گئے ہیں تاکہ امریکہ اور ایران کے درمیان مذاکرات کے دوسرے دور کی تیاری کی جا سکے۔
سی این این نے اپنے ذرائع کے حوالے سے بتایا کہ امریکہ اور ایران کے درمیان مذاکرات کا دوسرا دور بدھ 22 اپریل کی صبح اسلام آباد میں ہوگا۔
رپورٹ کے مطابق امریکی وفد کی قیادت نائب صدر جے ڈی وینس کریں گے جبکہ ایرانی وفد کی سربراہی پارلیمنٹ کے اسپیکر محمد باقر قالیباف کریں گے۔
یاد رہے کہ ایران اور امریکہ کے درمیان 11 اپریل کو بھی اسلام آباد میں مذاکرات ہوئے تھے تاہم بعد میں دونوں ممالک نے اعلان کیا کہ کئی اختلافات کے باعث طویل المدتی حل پر اتفاق نہ ہو سکا۔